SETOR PRIVADU SEIDAUK PRONTU ADERE BA ASEAN

Camara Comersiu Industria Timor-Leste (CCI-TL)  seidauk pronto adere ba Asosiation South East Asia Nation (ASEAN), tanba setor privadu sira to’o agora seidauk preparadu hodi kompete ho setor privadu hosi nasaun membru ASEAN nian.

Prezidenti CCI-TL, Oscar Lima, hateten katak, Timor-Leste atu tama ba ASEAN la’os buat fasil, maibe politikamente TL tenke tama, tanba TL persiza tama duni ba ASEAN.  “Adere ba ASEAN Laos fasil, tanba ita seidauk preparadu, ba hau pesoal koalia hanesan privadu ita seidauk preparadu atu kompete ho emprezariu sira ne’ebe mai husi ASEAN ne’e,” hateten Prezidenti CCI-TL, Oscar Lima ba GMN iha nia kna’ar fatin, Acait, Dili, foin lalais ne’e.

Emprezariu nasional ne’e argumenta tan katak, persija sukat tanba emprezariu Timor oan sira hamutuk seidauk iha forca husi bele tama ba ASEAN hodi kompete ho maluk emprezariu hirak ne’ebe maka husi ASEAN, hanesan husi China, Indonesia no nasaun seluk tann ne’ebe maka halo ona investimentu iha Timor-Leste. Kuandu abertu ona emprezariu Timor-oan bele ba no sira mos bele mai livre.

CCI-TL husu ba Governu atu persiza haree didiak preukupasaun ne’e hodi nune’e setor pribadu sira bele prepara hodi kompete ho investor internasional sira.  “Se Governu la prepara setor privadu nasional sira ne’e susar uituan atu ita ba kompete ho ema,” dehan Oscar Lima.

Prezidenti CCI-TL ne’e sujere ba Governu foun atu prepara formasaun ba setor privadu sira, aliende formasuan, persija iha mos inisiativa hanesan agora dadauk kreditu, iha inisiativa orsamentu ho jurus ne’ebe maka ki’ik para setor privadu sira bele konsege hodi prepara an halo didiak, atu nune’e kuandu TL tama ASEAN, TL mos bele kompete ho sira, se lae susar.

 Antes ne’e, Ministru Estadu Kordenador Asuntu Ekonomia (MEKAE) no Ministru Agrikultura Peskas (MAP), Estanislau Aleixo da Silva hateten, Governu prontu atu apoia setor privadu nasional.

 “Ita haree kuandu setor privadu nasional maka fraku, ne’e duni ita tama ba ASEAN mos ema rai hirak sleuk maka sei domina, tanba ne’e ita lakohi, ita tama ASEAN hanesan parte komunidade ida entaun ita mos defende ita nia soberania no defende mos ita nia Timor-oan sira ne’ebe iha setor privadu,” hateten  Ministru Estanislau Aleixo da Silva.

*gmntv.tl