Konstituisaun La Taka Dalan ba Publiku Halo Keisa ba Dezisaun PR

Prezidenti Parlamentu Nasional (PN) Aniceto  Lounginhos Guterres Lopes hatete, konstituisaun la taka dalan ba publiku atu fo opiniaun no halo kritika ba Prezidenti Republiku (PR) Francisco Guterres Lu-Olo nia dezisaun ne’ebe foti hodi fo posse ba estrutura VII Governu Kontituisional karik inkonstitusional.

“Hau lakoi komenta kona ba ida ne’e, bom iha rai demokratiku hotu-hotu iha direitu atu fo opiniaun ka rekere ba dezisaun prezidenti hanesan ita nia ulun bo’ot ba nasaun ne’e nian konstituisional ka la kontituisional,” dehan Prezidente PN Aniceto Guterres hafoin remata sorumutu ho PR Lu-Olo iha Palasiu Prezidensial Aitarak Laran, Bairo Pite, Dili, Kuarta (20/09/2017).

Durante ne’e, publiku preokupa tebes ho dezisaun PR nian ba VII Governu liu husi media sosial sira hodi dehan inkonstitusional. Tanba ne’e Prezidente PN Aniceto afirma, livre ba ema hotu atu rekere, maibe laos jurista mak atu pronunsia, maibe Tribunal mak tenki anunsia.

“Kuandu iha pedidu hosi parte ruma iha kompetensia atu rekere ba Tribunal, laos kualker ema ida atu halai ba tribunal hodi halo  prosesu ke nia jurista prontu ne’e, komentariu no ideia sira ne’e bele deit tanba ita iha rai demokrasia,” dehan Aniceto.

Antes ne’e, Melio de Jesus nudar sidadaun ho nia lisensiatura de dereto kestiona dezisaun PR Lu-Olo hodi forma no fo posse VII Governu Konstitusional no konsidera ida ne’e kontra konstituisaun.

*thetimor-news.com