KHUNTO Sei Publika Desizaun Ba Pozisaun Koligasaun Ou Lae Iha Tempu Badak

“Laos ita ba tanba kadera ka tanba kargu mak ita ba, maibe tenke ho objetivu ida katak kria amizade, atu nune’e bele hetan unidade ida ne’ebe forte ba nasaun ida ne’e” Deklara Naimori.

 Partidu KHUNTO hetan konvite hosi Prezidente da Republika, Dr. Francisco Guterres Lú Olo. Liu hosi enkontru ida ne’e, ho objetivu atu fo hanoin ba lideransa partidu sira hodi mantein unidade nasional.

Conselhor Superior Partidu KHUNTO, Jose do Santos ‘Naimori Bukar’, ba jornalista sira hafoin enkontru ho Prezidente Lú Olo hateten katak, Partidu KHUNTO respeita ba konvite hosi Prezidente da Republika, ho nune’e KHUNTO mai marka prezensa iha palacio da prezidente.

“Ami respeita konvite hosi Prezidente, ne’e mak ami mai, hodi rona nia hanoin kona ba unidade nasional. Ida ne’e mak Prezidente hatoo ba lideransa partidu sira, atu nune’e ita hotu kria estabilidade no hamosu unidade nasional, atu nune’e ita nia povu sira lao hakmatek”, hateten Naimor Bukar.

Hatan perguntas hosi jornalista sira, tanba sa KHUNTO la marka prezensa iha CCF iha dadersan hodi asina akordu ba koligasaun?

Naimori esplika katak ne’e asumtu uma laran, labele koalia, “hau sente ida ne’e asumtu uma laran, hau labele koalia, ne’ebe aban mak fo sai, aban oras tuku 7 to tuku 9 dader hanesan mak ami fo hatene”.

Naimori reforsa katak, KHUNTO hatete ona iha prinsipiu ida katak, prontu koopera iha kualker tempu, iha kalan ka loron KHUNTO prontu, maibe premeiru tenke kria amizade ida entre partidu. Atu kria amizade ne’ebe forte entre lideransa.

“Laos ita ba tanba kadera ka tanba kargu mak ita ba, maibe tenke ho obejtivu ida katak kria amizade, atu nune’e bele hetan unidade ida ne’ebe forte ba nasaun ida ne’e”, konfesa Naimori ho oin hamnasa iha palacio prezidente, loron 13/09 ba jornalista sira.

Iha parte seluk, komunidade Bairo-Pitte, Florentia Batista, ba TAFARA.TL hateten katak, presiza kria unidade nasional hosi ulun boot sira, atu nune’e povu sira mos bele halo tuir.

“Ulun boot sira laiha unidade, ami ema kiik sira mos sei laiha unidade ba malu, ne’ebe diak liu rona malu, fiar malu no lao hamutuk hodi nune’e halo ami kalan toba hakmatek”, hateten Florentina ho fuan boot.

tafara.tl