José Neves : “Partidu eziste atu kontribui ba Estadu”

Kandidatu Ministru Edukasaun ba sétimu Governu, José António de Jesus Neves Samala Rua hateten, partidu eziste atu kontribui hodi fó solusaun ba problema ne’ebé Estadu infrenta. Tanba ne’e nia desidi simu konvite husi Primeiru Ministru (PM) Marí Alkatiri involve iha Governu, tanba interese Estadu.

“Partide eziste iha Estadu para halo saida. Atu kontribui no fó solusaun ba situasaun no problema ne’ebé Estadu infrenta. Ne’ebé ha’u foti medidas ida ne’e, la’os tan ha’u nia interese, maibé interese estadu. Iha vantajen mós partidu, iha vantajen mós ba Estadu liu-liu. Estadu hasoru difikuldade hanesan ne’e, ema barak tauk atu ba Governu, maibé tuir loloos situasaun sira ne’e hanesna ne’e mak presiza ita nia kontribuisaun, presiza ita nia apoiu”, José Neves Samala Rua deklara ba GMN iha Knua Samalarua Palapaço Díli Kinta feira (28/9), wainhira konfirma konaba konvite partidu FRETILIN no mós Primeiru Ministru Marí Alkatiri ba nia atu involve-an iha partidu.

José Neves afirma, maski ninia desizaun ne’e ses oituan husi medidas balun ne’ebé partidu kesi, maibé prontu simu konsikuensia ou sansaun husi partidu, tanba desizaun ne’ebé nia foti, ho konsentemente katak, la viola prinsípiu báziku atu kontribui ba Estadu.

“Estadu nia interese mak boot liu. Partidu eziste para kontribui ba interese Estadu, hametin interese Estadu nia funsionamentu. Ne’ebé ha’u foti saida mak prioritáriu iha ha’u nia Estadu ida ne’e”, José Neves fundamenta.

José Neves dehan tan, partidu ne’e instrumentu polítiku ba viabiliza, fó dalan ba ema atu ba serbi Estadu.

“Mai ha’u ne’e, ita tenki disiplina, maibé ita hotu-hotu hatene hela katak, ida ne’ebé mak mais importante. Prezidenti partidu iha koñesementu, ha’u halo komunikasaun ho Prezidenti partidu, no Prezidenti Partidu hateten mai ha’u katak, desizaun iha ha’u nia liman. Ha’u desidi no ha’u informa ba Prezidenti katak, ha’u ba partisipa iha Governasaun ida ne’e, iha estrutura Edukasaun. I prezidenti iha koñesementu konaba ida ne’e”, José Neves hateten.

José Neves afirma mós katak, komunikasaun entre nia ho prezidenti Partidu kontinua la’o, no kontinua komunika mós ho partidu mais votadu FRETILIN no mós ninia lideransa másimu ne’ebé oras ne’e lidera sétimu Governu, Primeiru Ministru Marí Alkatiri.

Figura José Neves Samala Rua, iha esperénsia servisu lubuk ida, durante iha nia vida, iha instituisaun independenti sira, inklui involve-an maka’as iha organizasaun sira ne’ebé mak luta ba ukun rasik-an Timor Leste nian.

Iha fulan Maiu 2010 asume kargu hanesan Komisáriu Adjuntu Komisaun Anti Korrupsaun (KAK) to’o fulan Juñu 2016.

José Neves Samala Rua mós kandidatu Prezidenti Repúblika ba periodu 2017-2022 ho númeru sorteiu hat, maibé la konsege hetan votu barak iha eleisaun Prezidensiál foin lalais ne’e.

Antes ne’e Vise Prezidenti no aktual Prezidenti bankada PLP, Fidelis Magalhães hateten ona katak, membru sira ne’ebé involve iha Governu sei espulsa husi partidu, tanba partidu desidi-an sai opozisaun iha parlamentu.

*gmntv.tl