Alkatiri Lakohi ‘Rende’ Ba Opozisaun Maioria

Governu ne’ebé moris frajil ho kadeira 30 no opozisaun maioria ho kadeira 35 sai hanesan ‘ameasa’ ida. Maski nune’e, ba aprezentasaun Orsamentu Jerál Estadu (OJE), Primeiru Ministru, Mari Alkatiri, otimista no avansa nafatin ba oin.

VII Governu Konstitusionál lakohi atu ‘rende’ sedu, tanba órgaun ezekutivu ne’e sei aprezenta programa ba interese povu no nasaun nian, hodi liberta sidadaun sira husik kiak no mukit.
Tanba ne’e, PM Alkatiri hateten, la’o to’ok mak haree, kuandu Governu aprezenta programa mak foin hatene partidu opozisaun vota kontra ka a favór.

“Governu halo programa atu serbí povu ida ne’e, atu hasai husi mukit no kiak atu lori dezenvolvimentu ba to’o fatin ne'ebé presiza”, dehan nia, hafoin soru-mutu ho Xefe Estadu, Francisco Guterres ‘Lú-Olo’, iha Palasiu Prezidensiál Ai-Tarak Laran, horisehik.

Tanba ne’e, Alkatiri husu ba deputadu opozisaun sira atu kolabora no kontribui-malu hodi hadi’a dezenvolvimentu nasaun no ba povu nia futuru.

Entretantu, kona-ba tomada-de-pose ba daruak membru Governu sira, sei halo ho modelu inkluzivu.
Kona-ba rezultadu servisu VII Governu iha loron 100 nian, nia dehan, servisu loron hira-hira la’ós sai barómetru ba Governu nian, maibé sei haree liu ba rezultadu servisu jeralmente.

*independente.tl