Akademiku Duvidas, Governu Dura

Komunidade akademiku duvida boot, setimu governu neebe lidera husi Primeiru Ministru Mari Alkatiri sei bele dura ba tinan liman. Tanba hare ba situasaun real, partidu opozisaun maioria ho asentu 35, kompara ho koligasaun kadeira 30.

Prosesu ba oin nee oinsa bele garante durasaun nee too tina lima ka lae duvidas boot, tanba hare ba situasaun real partidu opzisaun maioria ho 35 kadeiras no partidu neebe forma VII governu ho deit 30 kadeiras,” dehan   Joao Antonio Soares liu husi debate publiku iha programa Dili Demokracy ForumDDF), Kuarta,(20/09/2017).

Nia informa tuir Konstituisional RDTL artigu 106, formasaun governu kbiit tomak mai husi partidu neebe mak manan iha eleisaun parlamentar, tantu maioria absoluta ka simples. Maibe formasaun VII governu sei sai duvidas boot, garante ba tinan lima. Mesmu nunee tuir Antonio politika iha nia dinamika neebe bele muda oras ba oras, tanba nee iha akordu no konsensus ruma atu garante governu ida nee dura ba tinan lima.

Antonio hatutan intensaun atu garante estabilidade nasaun atu povu hotu hotu bele moris hakmatek, dezenvolvimentu lao diak, tanba povu fo fiar ona ba lideransa sira liu husi partidu politiku atu lori konfiansa nee ba dalan ida neebe diak.

Nunee mos Eis Deputadu Leandro Isaac dehan, formasaun VII governu sei  sai duvidas boot ba publiku, tanba partidu neebe forma governu, simu pose nee minoria  iha parlamentar, enkuantu opozisaun maioria,  nee duvidas.

Nia hatutan governu ida nee bele dura mos la dura, nunee bele akontese eleisaun antisipada tanba partidu opozisaun maioria, hanesan partidu politika PLP neebe hakara atu hapara projetu ZEEMS no Auto estrada tasi mane, ida nee bele komplikadu wainhira aprova orsamentu jeral.

Enkuantu Jurista Manuel Tilman liu husi debate publiku dehan setimu governu bele lao no dura too tinan lima, tanba interese partidu boot rua, CNRT no Fretilin ba auto projetu infraestrutura ZEEMS no tasi mane.  Projetu hirak nee obra partidu CNRT nian, tan nee imposivel ba CNRT atu vota kontra orsamentu jeral estadu. Nia hatutan iha parte seluk  fraze balu husi atual PM Mari Bin Amudi Alkatiri dehan Fretilin manan Xanana manan, tanba nee fiar  VII governu sei dura iha tinan lima nia laran.

*STL