Semana oin, Munisípiu Dili hala’o operasaun ba animal

Prezidenti Autoridade Munisípiu Dili, Gaspar Soares, informa, semana oin Guarda Munisípiu Dili koordena ho Polísia Nasional Timor Leste (PNTL), Munisípiu Dili sei hala’o fali operasaun ba animal iha kapital Dili, tanba kapital Dili la’os fatin atu husik animal.

Gaspar Soares esplika, agora dadaun ne’e, operasaun ne’e paradu tiha tanba kareta 4 ba guarda Munisípiu Dili nian ne’ebé durante ne’e hala’o operasaun iha avaria. Situasaun ne’e impede servisu guarda Munisípiu Dili nian atu kontrola kapital Dili.

“Semana oin kordena hamutuk ho Polísia Nasional Timor Leste (PNTL) Munisípiu Dili atu kontinua hala’o operasaun ba atividade sira ne’e, hodi bele identifika animal sira ne’ebé sei la’o iha dalan ninin, inklui vendador sira ne’ebé sei kontinua fa’an iha trotoar leten, hanesan Comoro, dalan diresaun Audian foho osan mean, no bundaran sa’e ba Dom Bosco no parte Delta Elemloi nian, ne’ebé prejudika tebes sirkulasaun transporte no ema la’o ain sira,”hateten Gaspar ba GMN iha nia kna’ar fatin Caicoli, Dili, Sesta, (01/12).

Nia hatutan, operasaun ba animal sira iha Dili laran deside hapara provizoria tiha, maibe komunidade balu hahú husik fali animal iha estrada ninin, inklui mós vendedor sira balu ne’ebé kontinua fa’an iha dalan ninin, hodi halo imajen kapital nasaun Timor Leste nian ladiak.

“Ami  durante semana rua ona la hala’o operasaun ne’ebé semana oin kontinua halo operasaun tanba kareta 4 operasaun nian halo hela manutensaun,”hateten Gaspar Soares.

Ho situasaun ne’e, Gaspar fó ona orientasaun ba Xefe Jestaun Merkadu ba Orden Públika atu haree kareta sira ne’e atu halo manutensaun lalais, nune’e guarda Munisípiu Dili bele hala’o fali operasaun iha kapital Dili.

Nia haktuir, Governu iha ona dekretu lei No.33 kona ba orden públiku nian atu labele husik animal iha sidade laran.

“Lei mós hateten katak, bele hakiak animal, maibé tenki iha luhan ida atu husik animal sira, nune’e labele prejudika  ita-nia viziñu sira-nia moris  lor-loron, tanba dala barak viziñu sira mak mai hato’o keixa iha Munisípiu, ami fó notifikasaun dala tolu mak la halo tuir nafatin, sei foti medidas tuir dekretu lei ne’ebé mak iha ona,”relata Gaspar.

Nia afirma,   ba vendador sira ne’ebé mak fa’an iha trotoar leten mós lei komersiu nian iha ona, maibé labele taka dalan ba ema la’o ain, tanba trotoar ne’e fatin atu ema la’o, la’os fatin atu halo negósiu.

Gaspar informa, durante ne’e  Autoridade Munisípiu Dili  halo bebeik ona sosializasaun kona-ba lei sira ne’e, maibé  komunidade balun laiha konsiensia.

@gmntv.tl