Xanana: Espera PR Lú Olo Kumpri Konstituisaun no Ami Sei Fo Apoio Tomak

Situasaun politika depois de elisaun Jeral 2017, hamosu preokupasaun ne’ebe mai hosi povu, hodi hein desizaun saida mak ukun nain no lideransa hosi 1975 sira atu foti. Ho situasaun ne’ebe lao dadaok Prezidente CNRT, Xanana Gusmao ne’ebe fulan hira nia laran sei halo servisu iha rai liur, hodi kontinua akompanna situasaun rai laran.

Ho situasaun politika ne’ebe lao, Prezidente partidu CNRT, Xanana Gusmao, Prezidente PLP, Taur Matan Ruak no Koseleiru Partidu KHUNTO hasoru malu iha Singapura hodi refleta ba situasuan politika ne’ebe lao hela.

Liu hosi mesajen ne’ebe hatoo ba povu Timor-Leste, liu hosi chanel GMN TV, Xanana Gusmao hateten kata krona tiha dirigentes partidu PLP no KHUNTO nian kona ba situasaun rai laran, sente iha obrigasaun boot atu responde ba interese nasaun nian.

“Ohin ami hare’e fila fali ba kotuk, politiku entre partidu nain tolu ne’ebe ami sente ona loron hirak liu ba. Ami iha ne’e mos hato’o ami nia respeitu tomak ba Presidente da Republika Dr. Francisco Guterres Lú Olo, ami sauda instituisoens estadu nian tomak, hodi afirma katak partidu tolu ne’ebe tuir sira nia konferensia ida-idak harii Aliansa Maioria Parlamentar (AMP), atu dehan deit katak ami prontu atu responde ba situasaun difisil ne’ebe mosu daudauk. Ami la fó kulpa ba ema ida, nu’udar partidus polítikus ami senti iha responsabilidade boot katak ami tenki prepara atu bele fó dalan di’ak ida hodi hasai povu husi krize polítika ida ne’e”, hateten Xanana Gusmao.

Xanana Gusmao informa katak Prezidente da Repúblika hakerek mai ha’u, hodi dehan katak senti orgullu tebes, tanba situasaun ida ne’e iha aspeitu positivu boot ida, sosiedade komesa diskute Konstituisaun, komesa komprende prosesu konstrusaun Estadu.

“Ha’u mós konkorda, Taur Matan Ruak mós konkorda, José Naimori mós konkorda ho afirmasaun Prezidente da Repúblika nian katak situasaun hanesan ne’e maka lori ita atu komprende di’ak liu tan prosesu konstrusaun estadu no konstrusaun nasaun. Ami na’in tolu senti katak, dalan atu rezolve situasaun ida ne’e iha Prezidente da Repúblika, Dr. Francisco Guterres Lú Olo nia liman, ami espera Prezidente da Repúblika sei kumpri Konstituisaun e ami sei fó apoiu tomak, atu kumpri Konstituisaun tamba Konstituisaun mak garante vida estadu tomak  I vida ba nasaun tomak”, esplika Xanana

Lideransa nasional ne’e mos informa ba povu katak lalika laran taridu, lalika preokupa barak, iha difikuldade hanesan ne’e mak ita hotu bele buka tau hamutuk ita nia hanoin dalaruma ema bele husu nusa mak Xanana ho Taur hirus malu tiha agora hakuak malu, nudar humanu ita hotu iha ita nia komportamentu sira lor-loron nian, hahu husi uma laran, iha vizinhu sira nian to iha suku, “Kuandu interese nasional mosu, ami nain rua hare katak buat ida entre ami nain rua kiik demais, tamba ida ne’e hau la temi koragen, mais tamba ida ne’e ami iha komprimisu ida katak ami nain tolu sei bele lori knaar ne’ebe karik estadu prontu atu simu”.

Eis Premeiru Ministru ne’e esklarese liu tan katak AMP prontu, sei la obriga ema ida liu-liu sei la obriga Prezidente da Republika atu viola Konstituisaun,  “ami nia komprimisiu ida bo’ot tebes mas se AMP hetan konfiansa politika bele fiar ba ami sei halao ami nia responsabilidade hodi serbi, serbi nasaun, serbi povu I hametin ita nia estadu. Ami sei simu ho responsabilidade tomak, saida de’it, responsabilidade dever atu servi ho di’ak,  ida ne’e mak ami nia komprimisiu”.

@tafara.tl