Tiago ho Fong halai sai husi Timor-Leste ba Australia hafoin kondenasaun pekulatu nebe mak Tribunal Distrital Dili hamonu ba kaben nain rua nee.
Sidadaun rua nee husik Australia iha Sabadu, 25 Novembru, hodi fila fali ba sira nia rai, Portugal, no simu kedas husik familia lubuk ida nebe mak hein hela sira iha Aeroportu Lisboa nian, hanesan haktuir media online Portugal nian, TVI24.
Tiago no Fong ninia desizaun hodi halai sai husi Timor-Leste hamosu tensaun diplomatika entre Porugal no Timor-Leste, hafoin assuntu nee hetan kritika forti husi dirijenti politiku no sosiedade sivil sira Timor-Leste nian nebe ijiji makaas atu halo investigasaun ba embaxada Portugal iha Dili.
Maske nunee, haktuir mos media nee, iha semana kotuk ministro Negosiu Estranjeiru Portugal, Augusto Santos Silva, fo ona garantia katak embaxada Portugal iha Dili respeita lejislasaun portugueza nian maske atribui passaporte ba kaben nain rua nee.
Tiago no nia kaben, Fong, halo renovasaun ba sira nia kartaun sidadaun (Portugal) iha inisiu tinan ida nee, no ikus mai konsegue hetan passaporte portugues nian.
“Sidadaun hotu-hotu iha direitu atu hetan dokumentu identifikasaun nudar sidadaun portugues, la hare ba sira nia situasaun juridika, naran katak la viola dispozisaun legal sira. Iha Tiago no Fong nia kazu, la akontese viaolasaun ruma, konforme inkeritu nebe mak ami halo ona ba embaxada, katak lejislasaun portugueza nebe mak aplika iha neba kumpri duni, tamba nee mak atribui passaporte ba sira nain rua”, ministro Santos Silva halo esplikasaun hanesan haktuir TVI24.
Tribunal Distrital Dili hamonu sentensa kadeia tinan 8 ba Tiago no Fong no tenki selu tan indemnizasaun ho osan dolar Americano mil 859 ba kazu pekulatu nebe kondena ba sira nain rua.
@buletintimor.com
No comments:
Post a Comment