MS deve Hospital Internasional sira milaun 6 USD

Vise Ministru Saude, Luis Lobato hatete Ministeriu Saúde deve Hospital Internasional sira milaun 6 dolar Amerikanu tamba durante governu transfere pasiente sira ba halo tratamentu iha Hospital Internasional sira ne’e seidauk selu.

Hospital Internasional sira ne’ebe governu Timor-Leste seidauk selu mak, Hospital iha Singapura,  Malaysia, Bali no Hospital Jakarta, ne’ebe osan hamutuk milaun 6 dolar amerikanu.

Tuir Vise Ministru Saúde Luis Lobato, Ministeriu Saúde tinan ida gasta osan milaun 9 hodi halo transferensia pasiente ba halo tratamentu iha rai liur.

“Foin lalais ita atu halo tan transferensia pasiente 10 ba Hospital Singapura, maibe husi Hospital refere simu pasiente 3 deit tanba atu ba kontrola deit no moras foun sira lakohi simu tanba ita sei deve hela sira miliaun 3” dehan Luis Lobato ba Jornalista sira iha Hotel Timor Dili, Kuarta (08/11/2017).

Vice Ministru Saúde nee hatutan, Ministériu Saúde tenta hela atu selu deve oituan-tuan hodi sira bele simu ita nia pasiente sira, tanba Ministeriu Saúde osan laiha no hein hela orsamentu rafitikativu ne´ebe bele ajuda taka dividas hirak ne´e.

“Ida ne´e kazu ida ita tenke haree maibe hau hakarak dehan katak solusaun laos ida ne´e, no solusaun oinsa Governu rasik bele hadia situasaun iha ita nia rai, hadia hospital sira atu Hospital ne´ebe diak no kompletu atu bele prevene halo transferensia moras ba liur, ida ne´e mak servisu Ministériu Saude nian agora”, hatete Vice Ministru Saude.

Vice Ministru afirma, Hospital Nasional iha 900 Funsionariu Estadu no iha  30 ou 40 % nebe lor-loron halo servisu ba moras sira, barak liu servisu iha gestaun Admistrativa Financeira, ita tenke hadia ida ne´e kolokasaun rekursos humanos tenke konside ho problema asistensia saude nasional.

Vise Ministru Saúde nee rekuñese iha mediku estranjeiru servisu iha hospital nasional nebe selu 4 too 6 mil Dolar Amerikanu maibe tenki haruka pasiente sira ba rai liur tamba Hospital Nasional fasilidade la kompletu.

“Agora dividas miliaun 6 ne´e iha tinan 1 nia laran, no iha tinan 2016 ita kria dividas miliaun 6 iha liur , maibe agora Ministériu hamaus hela Hospital Estranjeiru sira atu sira bele simu fali ita nia pasiente hodi halo tratamentu, porblema ba veteranus laiha tanba veteranus sira iha osan atu bele halo tratamentu, maibe povu kiik sira,” tenik Luis Lobato. 

@gmntv.tl