Estadu iha dever fo onra ba heróis Masakre Santa Cruz

Ho sakrifisiu boot herois joventude loriku aswain sira nian iha Masakre Santa Cruz, 12 Novembru 1991, nudar kontribuisaun hodi fo determinasaun ba Timor nia independensia. Tanba ne’e, Estadu Timor Leste iha dever boot fo onra ba heoris no mate restu Masakre Santa Cruz sira.

“Hau hakarak fo obrigadu no agradese ba sira ne’ebe iha tempu ne’eba fo sira nia dedikasaun, sira nia vida tomak ba ita nia nasaun. Ita besik dau-daun ona atu selebra loron 12 Novmebru, ba integrantes sira ne’ebe sei moris ba sira no família, hau hato’o saudasaun espesial ba sira, hateten ba sira katak vale a pena ita batalha iha momentu ne’eba buka ukun an, ba sira ne’ebe mate ona, hau ho hau nia família hakarak hato’o sentimentu kondolensia profunda ba sira nia família tomak,” afirma eis Prezidenti Republika, Taur Matan Ruak, ba GMN iha Uma Matenek, Colmera, Dili, Sesta (09/11/2017).

Taur Matan Ruak, friza katak, heróis 12 Novembru nia isin lolon maka la iha, maibe sira nia naran no memoria nafatin iha povu Timor Leste nia fuan husi otas ba otas. Ho nune’e, Prezidenti Partidu Libertasaun Popular (PLP) ne’e husu atu entidade tomak forma diak atu fo ondra ba sakrifisiu joven sira nian maka re-defini papel saída maka ukun nain tenki halo para lori prosesu ida ne’e ba rohan.

“Ita la bele kontenti deit ba buat ne’ebe halo tiha ona, mas liu-liu konsentra ba saída maka tenke halo agora no aban bainrua para kontribui nafatin ba prosesu dezenvolvimentu ita nia nasaun,” hateten Taur Matan Ruak.

          Nia subliña tan katak, povu Timor hetan ona nia ukun an, moris diak seidauk hetan. Tanba ne’e, dalan uniku  atu fo ondra sira ne’ebe fo ona sira nia sakrifisiu maka fo hotu-hotu nia kontribuisaun hodi dezenvolve nasaun ida ne’e ba oin.

@gmntv.tl