CNRT sei delega reprezentante diálogu ho PR

Prezidente bankada CNRT, Arão Noe, esplika, partidu CNRT sei delega nia reprezentante hodi diálogu ho Prezidente Repúblika (PR), Francisco Guterres ‘Lú Olo’, bainhira Prezidente CNRT Kay Rala Xanana Gusmão seidauk fila mai Timor-Leste.

Prezidente bankada CNRT Arão Noe esplika, partidu la’os ema pesoal nian. Tamba ne’e, relasiona ho konvite hosi PR Lú Olo atu halo díalogu ho líder partidu tolu (CNRT,PLP no FRETILIN), hanesan Xanana Gusmão, Taur Matan Ruak no Marí Alkatiri, sira sei reprezentante ne’ebé partidu rasik mak sei hili.

Tuir planu, PR Lu-Olo sei konvoka diálogu ho lider máximu husi partidu sira ne’ebé hetan asentu parlamentar iha loron 15 fulan ne’e.

“Prezidente partidu bele delega nia Vise ida reprezenta partidu hodi ba partisipa ne’e normal, ka prezidente partidu rasik mak bele ba marka prezensa. Maibe ida ne’e sei depende de’it ba prosesu negosiasaun Fronteira Marítima ne’e mak ekipa hala’o hela iha Australia, tanba agora prezidente partidu sei hala’o hela misaun ida ba interese Estadu nian, la’os ba interese privadu. Tanba ne’e, ita tenke fo apoiu moral no orasaun, atu bele servisu ho diak, hodi bele lori bem estar mai Timor-Leste no ba jerasaun foun sira,”hateten Prezidente bankada CNRT, Arão Noe Amaral, ba jornalista iha Parlamentu Nasional, Tersa (07/11/2017).

Líder bankada CNRT ne’e garante, Prezidente Partidu CNRT Kay Rala Xanana Gusmão sei fila mai Timor-Leste molok to’o loron ne’ebé Xefi Estadu Francisco Lú Olo determina hodi díalogu, hodi bele responde konvite refere.

“Ita hein katak, prezidente partidu bele fila ona mai Timor, ami hosi partidu mós rona  duni konvite hosi Prezidente Repúblika atu díalogu, ida ne’e aktu normal ida ne’ebé kompetensia Prezidente Repúblika nian atu rona no halo díalogu ho partidu polítiku sira, ba estabilidade nasional,” haktuir Arão Noe.

Arão Noe, argumenta, Partidu hotu sei kontribui ba díalogu, maibe importante mak bele respeita regras konstitusionais, no labele viola konstitusional, entre partidu hotu, nu’udar Estadu direitu nian, tanba konstituisaun RDTL mak sai nu’udar regras fundamental.

Antes ne’e, Sekretariu Jeral partidu FRETILIN, Marí Alkatiri, deklara ona, nia parte prontu kualker tempu atu díalogu ho partidu hotu, ba interese Estadu no povu tomak nian. 

@gmntv.tl