Alkatiri: “Ha’u Sei Hatán Xanana Enkuantu Iha Timor”

Primeiru Ministru, Mari Alkatiri sei lakohi atu hatán ba deklarasaun sira ne’ebé fó sai ona hosi Xefe Negosiador Fronteira Marítima, Xanana Gusmão (Alkatiri nia kompadre) bainhira Xanana halo deklarasaun fora hosi Timor.

Afirmasaun ne’e Primeiru Ministru Sétimu Governu konstitusionál deklara hodi responde ba perguntas Jornalista sira bainhira hasoru malu ho Primeiru Ministru iha  Ospitál Nasionál Guido Valdares, Kuarta (23/11).

Tuir sekretáriu jerál Fretilín ne’e deklarasaun Xanana Gusmão kapasidade nu’udar prezidente partidu Kongresu Nasionál Rekonstrusaun Timorese (CNRT-Sigla-Portugés), tanba ne’e halo deklarasaun hamutuk ho Prezidente Partidu Libertasaun Popular, Taur Matan Ruak ho konselleiru Partidu KHUNTO hanesan aliadu ba bloku Aliansa Maioria Parlamentár-AMP (opozisaun maioria).

“Deklarasaun ne’ebé sira fó sai iha Singapura ha’u la hatán maibé kuandu Maun Boot Kay Rala Xanana Gusmão halo  deklarasaun iha Timor-Leste ha’u sei hatán netik,” Xefe Governu, Mari Alkatiri haktuir.

Entretantu antes ne’e, Primeiru ministru nia kompadre Prezidente Partidu CNRT, Kay Rala Xanana Gusmão iha Singapura fó sai katak, hasoru malu entre Xanana, Taur Matan Ruak, ho José Naimori Bucar konsidera hanesan momentu istóriku hodi tatoli mensajen konfiansa no hakmatek ba povu Timor-Leste relasiona ho situasaun polítiku ne’ebé ohin loron Timor enfrenta (Governu Vs AMP) hodi entrega ba Prezidente Repúblika atu rezolve tuir mandatu ne’ebé konstituisaun atribui ona.

“AMP la fó kulpa ba ema ida. Nu’udar partidu polítiku ami sente responsabilidade boot katak, ami tenke prepara an atu bele fó dalan di’ak ida hodi hasai povu hosi krize polítika ida ne’e,” Xanana Gusmão afirma. No espera katak Prezidente da Repúblika sei kumpre konstituisaun no direjente AMP nian fó apoiu tomak hodi Prezidente Repúblika kumpre konstituisaun, tanba konstituisaun mak garante vida ba estadu tomak no vida ba nasaun tomak.

@tatoli.tl