Povu Diak Liu Hakmatek

Bispu Dioseze Dili, Dom Virgilio do Carmo da Silva SDB, husu povu Timor Leste tomak atu hakmatek iha fatin, hodi hein no akompania debate neebe lao iha parlamentu Nasional.

Husu nafatin povu hakmatek, tanba ita fiar katak ita nia nai ulun sira, maske ulun fatuk moras oituan, maibe fo fiar oituan ba sira atu ho kompetensia neebe mak sira atu garante nafatin hakmatek iha rai laran,” dehan Dom Virgilio ba Jornalista sira iha Santuariu de Aitara, Soibada, Domiggu (15/10/2017).

Dom Virgilio hatutan desde kampana, ba votasaun to iha momentu ida nee fiar iha politiku sira, povu fo ona votu ba sira halo sira nia dever,  to agora  mantein hatudu Timor oan iha maduru no responsavel, mos dilemema oituan.

Iha parte ketak Diretor ONG Gertak, Faustinho Magno dehan,  PNTL presiza reforsa tan  operasaun iha tempu kalan, hodi bele kontrola movimentu komunidade sira nian.

Hau hanoin operasaun kalan neebe ita nia polisia halo tenke aumenta nia numeru para bele kontrola diak liu movimentu ema nian liu liu ba grupu organizadau sira neebe ho sasan kroat hanesan rama ambon ou ema proveita situasaun iha tempu kalan hodi hana malu no oho malu,” dehan Faustinho.

Nunee mos Xefe Suku Caicoli Hipolito Marque dehan, autoridade lokal ho Ofisial Polisia Suku (OPS) sempre iha koodenasaun servisu, tanba sira mos halo operasaun ba komunidade iha tempu kalan hodi divulga informasaun ba komunidade konaba arma branka.

“Ami hamutuk ho OPS dala ruma lao kalan hodi divulga informasaun ba komunidade sira kona ba arma branka, neduni ami iha Caicoli nafatin fo informasaun komunidade atu labele lori sasan kroat hanesan tudik, katana hodi lao iha tempu kalan,” tenik Hipolito.

*STL