PNTL-F-FDTL Garante Dame

 

Komandante Jerál, Júlio da Costa Hornay, hateten Polísia Nasionál Timor-Leste (PNTL) kompromete hamutuk ho FALINTIL-Forsa Defeza Timor-Lorosa’e (F-FDTL) garantidu asegura dame no estabilidade iha Nasaun.

“Prontu enfrenta kazu ruma, problema ruma karik mosu iha ita-nia rain relasaun ho situasaun, ami prontu atu enfrenta”, komisáriu Hornay ba jornalista sira iha Ministériu Negósiu Estranjeiru no Kooperasaun (MNEK), Praia dos Coqueiros, Dili, sesta (27/10).

“Ohin ami reuniaun hamutuk komandu rua ne’e, hamutuk iha kuartel F-FDTL atu esplika ida ne’e, orienta ida ne’e ba ami-nia komandante sira iha nível karaik”, informa lideransa másimu PNTL ne’e.

Nia akresenta objetivu reuniaun ne’e, hahú nível superiór to’o baze ho hanoin ida de’it mak prontu atu servi.


Nia mós fó hanoin nafatin ba membru PNTL sira katak hahú husi nia to’o ajente iha baze la iha autorizasaun atu envolve pratikamente iha partidu polítiku tan juramentu ona no lei orgánika PNTL nian mós define ona.

“Bele rona polítika nia lala’ok oinsá, bele estuda polítika ne’e oinsá, maibé labele envolve prátika polítika. Ami hetan atu komandante ka se de’it, fila ba uma”, haforsa.

Komandante ne’e mós kontinua fó mensajen ba povu, tenke hatudu nafatin maturidade polítika ba rai doben ne’e.

“Ita-nia dever hotu ona. Ita-nia direitu ita ezekuta ona iha prosesu eleisaun nia laran, tantu kampaña, eleisaun, kontajen, anúnsiu, buat hotu ita asegura. Ida ne’e mak ita-nia maturidade polítika, povu iha Timor-Leste bem feito i firmeza”, akresenta.

Tanba ne’e, nia apela katak situasaun polítika entrega ba lideransa másimu sira, tan sira mesak matenek, iha patriotizmu nomós nasionalizmu, tan ne’e situasaun polítika sei la’o di’ak iha loron ruma.

“Bainhira ita baku malu, tama komarka saugate de’it, moras no kanek mós sei saugate de’it, estabilidade polítika loron ida sei la’o normál”, Hornay fó hanoin tan.

Entretantu, antes ne’e, Maijór Jenerál F-FDTL, Lere Anan Timur no Komandante Jerál PNTL alerta ona ba públiku atu hakmatek ho situasaun polítika.

 

@tatoli.tl