PN sei fo ultimatum ba eis deputadu entrega Prado

Portavoz Parlamentu Nasional (PN), Lidia Norberta, informa, iha tempu badak PN sei fo ultimatum ba eis deputadu III lejislatura hodi entrega kareta Prado ba Estadu, bainhira fo karta ba dalarua laiha resposta.

“Ami haruka tan fali karta ba, hodi husu nafatin ba deputadu la re-eleitu sira atu koopera ho parlamentu nasional,”haktuir portavoz Parlamentu Nasional, Lidia Norberta ba jornalista liu hosi konferensia ba imprensa, Kinta (26/10/2017).

Lidia esplika, antes ne’e, Sekretariu Jeral Parlamentu Nasional, hato’o karta ba eis deputadu sira, inklui Prezidente PN rasik mós hato’o ona karta ba kada prezidente bankada lejislatura datoluk nian, maibe seidauk iha resposta.

Tanba ne’e, Prezidente PN deside atu hato’o tan karta ba dalarua nian, maibe wainhira nafatin laiha rezultadu maka Prezidente PN sei foti desizaun ba eis deputadu hirak ne’ebé la re-eleitu ba IV lejislatura nian.

“Parlamentu sei haruka tan karta ba daruak nian ba eis deputadu sira,a ntes ne’e mós parlamentu hato’o ona karta, inklui Prezidente PN mós haruka karta ba Xefi bankada sira, tanba iha lejislatura anterior iha mós partidu Frente Mudança, maibe to’o agora seidauk hetan resposta, entaun ami haruka tan fali ba, hodi husu nafatin ba deputadu la re-eleitu sira atu koopera ho parlamentu nasional,”hateten Lidia.

Portavoz PN akresenta,  PN hein resposta hosi karta ba segunda faze nian, hosi eis deputadu sira atu koopera ho PN, tanba PN sei mantein desizaun hodi dada fila kareta.

“Ita tenke tau fiar ba malu hanesan orgaun soberania, maibe ita mós tenke respeita dignidade deputadu la re-eleitu sira, maibe bainhira karta segunda parte nafatin eis deputadu sira laiha kooperasaun ho parlamentu, ita sei tama fali ba III faze, haruka nafatin karta ho ultimatum no prazu tempu, tanba Parlamentu Nasional konsistense nafatin ho desizaun ne’ebé mak foti ona katak tenke dada fila kareta,”relata Norberta.

Deputada Lidia informa, osan ne’ebé eis deputadu sira uza halo leilaun ho montante U$ 8000 ne’e, PN sei fo fila bainhira eis deputadu sira entrega kareta refere ba PN.

Sorin seluk, Prezidente bankada PLP, Fidelis Magalhães,  husu atu eis deputadu sira asselera lalais entrega kareta Prado, no nia parte sei husu progresu kona-ba karreta refere ba Prezidente Parlamentu Nasional, bainhira enkontru líder bankada.

To’o agora eis deputadu III lejislatura hamutuk 18 mak seidauk hatama kareta Prado ba patrimoniu PN.

Antes ne’e, deputadu la re-eleitu hamutuk 20 mak entrega ona kareta ba parlamentu nasional, no deputadu hamutuk 25 mak re-eleitu fali ba mandatu IV lejislatura.

@gmntv.tl