PD akuza opozisaun halo teatru iha PN “CNRT-PLP konsidera governu obriga deit opozisaun”

Deputadu Luis Mendes, husi bankada Partidu Demokrátiku (PD), akuza deputadu bankada opozisaun sira iha Parlamentu Nasionál, la’os reprezenta povu hodi koalia povu nia moris,  maibé halo fali teatru.

“Ami dadauk ne’e halo teatru oituan iha Parlamentu Nasionál, buat ne’ebé povu nian mak ami diskuti, mas ami lakohi atu vota ba ida ne’e, maibé media bele hato’o ba povu atu povu bele haree. Ko’alia kona ba floresta ne’e, buat estratejiku los, maibé ami vota kontra tiha. Floresta bele fó empregu ba ema, bele hadia ambiente, no floresta mós bele sai fontes reseitas foun ida, no bele troka reseitas husi mina ne’e,  no bele mós fornese bee, maibé programa ne’e ita rezeita tiha,” relata Luis Mendes iha plenária PN, Segunda (30/10).

Nia hatutan, deputadu hotu iha Parlamentu Nasionál lor-loron ko’alia de’it kona ba povu nia distinu, maibé vota kontra fali programa Governu nian ne’ebé diak tebes ba povu.

Konsidera Governu obriga opozisaun

Alende ne’e, Natalino dos Santos husi bankada CNRT, la konkorda ho akuzasaun bankada PD nian ne’ebé halo atake verbal ba deputadu bankada opozisaun, no husu bankada PD atu tau an hanesan reprezentante povu ne’ebé los, hodi labele manipula tun-sae.

“Ha’u husu atu labele dehan, fatin Parlamentu Nasionál ne’e teatru, ha’u haree hanesan impoin de’it. Se dehan katak, kaer ba liafuan ida hamutuk ita bele, ko’alia liafuan suave. Programa Governu ne’e impoin de’it ne’e, oinsa mak ema hakarak koopera. Fatin ne’e la’os fatin teatru, maibé fatin atu foti desizaun tuir konsiensia polítiku ne’ebé demokrásia haruka. ita iha ne’e reprezentante povu. Se dehan hamutuk ita bele, sukat lia fuan, la’os mai para obriga de’it,”katak Natalino dos Santos.

Natalino dos Santos haktuir, desizaun ne’ebé mak bankada opozisaun sira foti hodi aprezenta mosaun rejeisaun ba programa Governu nian ne’e, la kontra konstituisaun, maibé kumpri saida mak konstituisaun haruka.

Natalino mós dehan, partidu polítiku ne’ebé de’it inklui partidu opozisaun sira sempre mai ho nia programa mak hakarak lori dezenvolvimentu ba povu tomak, hanesan bee moos, hadia estrada, dada elektrisidade no seluk tan, laiha partidu ida mak lakohi fali atu halo dezenvolvimentu ba nia povu rasik. Tamba retórika ida ne’e, irasional.

Alende ne’e, deputadu Deometro Amaral, husi bankada PLP mós lamenta ho opiniaun bankada PD nian ne’ebé hatete Parlamentu Nasionál ne’ebé hanesan segundu orgaun iha Timor Leste ne’e, la’os atu halo fali teatru.

“Fatin ida ne’e atu halo polítika lolos hodi liberta ita-nia povu husi mukit no kiak, maske iha diferensa polítika, maibé ita nafatin hatur nu’udar polítiku hodi respeita malu iha fatin ida ne’e,”katak Deometro.

Tuir konstituisaun RDTL artigu 92 hatete katak, Parlamentu Nasionál mak órgaun soberania Repúblika Demokratika Timór-Leste nian ne’ebé reprezenta ema Timor-oan tomak, iha kbiit atu halo lei, atu fiskaliza no atu halo desizaun polítika. Tamba ne’e, deputadu opozisaun sira husu ba deputadu bankada apoiu Governu kuandu levanta kestaun ruma iha plenaria Parlamentu Nasional, tenki koalia lolos ba povu.

@gmntv.tl