Junta Organizasoens Rezisténsia ba Defeza Soberania Nasionál konsidera situasaun polítika rai laran nian, hafoin eleisaun parlamentar no tama iha faze forma governu dahituk, Timor-Leste hasoru tan dala ida situasaun krusial ne’ebé bolu timoroan tomak atu fó oin hodi buka lisuk solusaun.
Organizasaun rezisténsia sira liuhosi konferénsia ba imprensa, Sesta (27/10), deklaran, situasaun polítika rai laran nian ne’e fó impaktu mos ba vida ekonómika povo maubere nian, nune’e, ho neon brani no oin foti, tetu no sukat, hodi hamriik metin iha mahon unidade timor-oan nian bolu timoroan tomak, iha partidu eh laiha partidu, feto eh mane, katuas eh ferik no vetranos tomak, atu husik tiha interesse individuál, grupo, organizasaun ka partidu hodi fó oin los ba interesse nasional, hamrik metin hodi tahan soberania nasional Timor-Leste nian;
“Nune’e ami hosi junta das organizasoens rezisténsia ba defesa soberania nasional husu ba Presidente Republika uza nia kompetênsia tuir konstituisaun haruka hodi konvoka Maun Bo’ot Nain Tolu ( Xanana Gusmao, Mari Alkatiri no Taur Matan Ruak, Ulun Bo’ot Partidu ( PD no KHUNTO ) atu tur hamutuk ho Presidente da Republika hodi buka solusaun ba Situasaun ne’e iha tempo badak,” subliña Porta-voz Gregorio
Saldanha, iha Sede Nasionál Komite 12 Novembru, Balide, Kinta (27/10).
Gregorio hatutan, husu ba Maun Boot nain tolu (Xanana Gusmao, Mari Alkatiri no Taur Matan Ruak ), nu’udar ulun boot ba Partidu boot tolu no ulun boot iha Timor-Leste, atu tur hamutuk hodi buka dalan atu fo solusaun ba naksalak ne’ebé mosu.
Loke laran no fó oin ba malu, husu ba Maun Boot sira Lider hosi Partidu 5 iha assentu Parlamentar hodi haree hamutuk, haree lisuk no didiak Programa ne’ebé pro-Povo hodi kumpri promessas ne’ebé uluk ita halo hamutuk ho Povo Maubere, nune’e bele ultrapassa tiha situasaun de “impasse” Polítika no kumpri Tramites Constitucionais no halibur malu iha Dialogu ho bom sensu hodi Estabilidade no moris Povo ninian.
Povo liu hosi eleisaun parlamentar 2017 fó votu konfiansa ho mensagem ne’ebé k’momos tebes, katak “hodi malu ho malu”, atu forma governu hodi ukun tinan 5 laran, hari estabilidade no autoridade governativa hodi ukun, tan povo kolen ona atu iha tempo badak hakat fali ba urnas.
“Problemas iha Maun B’ot sira-nia dominio, tan ne’e, Maun Boot sira rasik iha kbit atu rezolve” tau hotu ba kotuk buat hirak ne’ebé la tama no la monu iha Maun Boot sira ida-idak nia laran.
Nu’udar ema ne’ebé barak ka uitoan uluk kontribui mós ba prosesu luta ba Ukun Rasik Án Timor-Leste nian, ami ho laran triste teb-tebes, katak ba reprezentante povu nian iha Uma Fukun Parlamentu Nasionál, Povo Maubere precisa moris di’ak no saudavel, tan ne’e hatur interesse nasional as liu interesse grupu ka Partidu nian, tan programa ne’e Pro-Povo, katak atu hadia Povo nia moris.
Tranzisaun jerasionál ida ne’e sei la fó folin, wainhira Lideransa Nasionál la hatudu NEON MATENEK, sei la fó folin, wainhira la hamutuk, sei la fó folin, wainhira iha Públiku nia oin ita hakoak malu ho hamnasa, iha kotuk ita hatun malu, hahalok ne’ebé sei transmite mós hosi jerasaun ba jerasaun.
“Ami lakohi tranzisaun ne’ebé podre “dodok”, ami hakarak tranzisaun ne’ebé saudavel, seguru, sustentavel no duradoura,” hatete Gregorio.
No comments:
Post a Comment