MUTL eziji PN kansela sosa Prado foun

Movimentu Universitariu Timor-Leste (MUTL) eziji Parlamentu Nasional (PN) liu husi hato’o petisaun hodi husu atu kansela sosa kareta Prado foun ba deputadu IV lejislatura sira.

MUTL konsidera polítika sosa kareta foun ba deputadu IV lejislatura, nu’udar despezas ida ne’ebé laiha retornu signifikante ba Estadu no povu, tanba ne’e MUTL husu deputadu foun atu kontinua uza kareta tuan ne’ebé III lejislatura rai hela.

MUTL mós husu atu halo retribuisaun orsamentu  ne’ebé atu sosa kareta foun ne’e, uza fali ba asuntu direitu báziku povu nian iha area ekonomia, sosial, kultura, no sivil polítiku ne’ebé seidauk hakonu ho loloos.

Polítika sosa kareta foun ne’e, MUTL konsidera hanesan forma traisaun ida ba povu nia rekursu orsamental no mós trai prinsipiu ne’ebé saudozu sira defende, hafoin liberta rai, sei liberta mós povu. Maibe MUTL konsidera infelismente povu nia moris seidauk libertadu, tanba povu sei moris kiak no mukit, deputadu no deputada sira kada periodu  kontinua goza iha povu nia sofrementu.

Hatan ba MUTL nia petisaun ne’e,  Prezidenti Parlamentu Nasional, Aniceto Guterres Lopes, konvida MUTL  atu halo díalogu hodi buka solusaun maske difisil, tanba IV lejislatura sei kontinua ho planu sosa kareta foun hodi fasilita deputadu sira halo fiskalizasaun, haktuir Portavoz Parlamentu Nasional, Lidia Norberta dos Santos liu husi konferensia imprensa ne’ebé hala’o iha PN, Kinta (05/10/2017).

Enkuantu MUTL fo data limitasaun ba resposta hosi Prezidenti PN nian to’o loron tolu, hahú husi hatama karta iha loron 2 fulan Outubru,  tinan ne’e.

Kuandu PN la altera polítika  ka inválida desizaun ka la kansela sosa kareta foun, MUTL promete sei mobiliza públiku, inklui inan-aman, igreja, juventude no entidade tomak, hodi halo manifestasaun pasífika hasoru PN iha tempu badak.

Antes ne’e, Konsellu Administrasaun PN halo reuniaun ona hodi vota unanimidade no entrega meja plenaria hodi halo konfirmasaun, maibe kuaze bankada hotu, entrega fali poder ba konsellu administrasaun hodi hola desizaun.

*gmntv.tl