Lere husu mantein VII Governu “Veteranus lakohi Governu monu”

Chefe Estadu Maior General FALINTIL-Força Defesa Timor Leste (F-FDTL), Major General Lere Anan Timur, nudar mos veteranus lori veteranus hotu iha Região I to’o Regiõa IV nia naran, husu atu mentain nafatin VII Governu Konstitusional, maske Govenur minoritariu.

“Ami veteranus sira hamutuk iha ne’e fo hanoin ba malu, sa pozisaun mak ami foti perante situasaun politika agora dadauk. Ami nia pozisaun mak ida ne’e, ami nudar veteranus ami nia responsabilidade moral, ami lakohi ita nia nasaun ne’e monu ba krizi, ami lakohi Governu atu monu,” afirma Veteranus Lere Anan Timur liu husi konfrensia ba imprensa ne’ebe mak hala’o Kuartel General F-FDTL, Segunda (23/10/2017).

Lere Anan Timur aprofunda katak,  maske Governu bele ki’ik maibe tenke apoiu malu lao ba oin, to’o tinan lima nia laran no la bele  husik prezidensia át.

“Ami lakohi Governu monu tanba ami lakohi husik prezidensia at ba jerasaun foun ba aban rua. Ita líder nasionais líder historis idade mak ne’e ona, kuaze  tinan 60 ba leten hotu ona,” afirma Lere Anan Timur.

Lere Anan Timur mos konsidera opurtunidade lidera tinan lima ne’e nudar ultimo, kontinua lori no kuda hela buat diak ba jerasaun foun sira, para aban bainrua jerasaun foun la bele komete sala ne’ebe jerasaun tuan sira halo.

Lere Anan Timur afirma tan, a lakohi husik prezdiensia át katak lakohi ohin ida sae, aban ida sae, aban bainrua ida tun, tanba ne’e mak ohin loron povu kontinua kiak nafatin no ba bei-beik.

“Ita uluk iha Guine Bisau dehan ita mak sai dame nain maibe ita lahatene jere,” hateten Lere Anan Timur hodi aprofunda mos katak nudar jerasaun katuas sira preokupa liu mak povu ninia moris diak, no kontinua sei preokupa, tanba ne’e nudar veteranus kuadrus meudus, superior iha dever moral no apela ba líder sira liu-liu maun bo’ot Xanana, lider nasional, internasional ninia karismatiku, líder histori Ramos Horta, líder histori Mari Alkatiri ho maun Taur Matan Ruak, atu tuuur hamutuk hodi rezolve dezintendimentu hotu.

“Lolos ami ne’ebe la hatene lei, Governu mantein nafatin, servisu hamutuk tinan lima la barak no tinan lima mai ukun la diak, povu dehan diak liu sai,” haktuir Lere Anan Timur.