Tanba daun-daun ne’e povu Timor-Leste (TL) envrenta krizi politiku no lideransa maka husu hotu-hotu atu kontribui ba garante seguransa estabilidade iha idak-idak nia hela fatin.
“Hau hanoin situasaun ne’ebé mosu daun-daun ne’e maka krizi politiku no krizi lideransa. Nune’e, ami lakohi para povu ki’ik sira ne’e ba sunu malu hosi facebook para hamanas nafatin situasaun.”
Hateten Xefe Estadu Falintil-Forsa Defesa Timor-Leste (F-FDTL), Major Jeneral Lere Anan Timur ba Jornalistahafoin remata enkontru ho Prezidente Repúblika Francisco Guterres Lú Olo iha Palasiu Presidensiál.
Nia esplika, F-FDTL hamutuk ho Polisia Nasionál Timor-Leste (PNTL) ne’ebé kaer lei no órdem nia dever no misaun maka garante seguransa estabilidade para komunidade no joven sira tu’ur hakmatek ho situasaun politika rai laran.
Ba lider sira Lere husu atu aprende hosi lider seluk. “Hanesan Maun Bo’ot Xanana dehan, lider ida tenki aprende hosi nia mestri bo’ot maka ita nia sala rasik no maluk sira seluk nia sala hodi hanorin ita. Hau aprende hosi sala,” tenik Lere hodi soe lia fuan.
Lere mós apela ba lider ne’ebé sira hamutuk mai hosi ai-laran laiha preparasaun akademika. Laiha kultura ambisaun literariu ne’ebé bo’ot. Maibé, konsege lori funu durante tinan 24 to’o ohin loron sai nasaun, atu ajuda kontribui ba garante seguransa estabilidade.
Aliende ne’e Lere mós apela ba lider historiku ne’ebé maka historia repete bei-beik. Loron-loron koalia dehan ita nia independensia no soberania. Ita fakar ra’an. Laos novidade fakar ra’an no soe isin. Ne’e tau ba kotuk, maka ita hakerek iha historia. Maibé, iha situasaun krizi lideransa ne’e ajuda para hatutan situasaun garante seguransa estabilidade.
“Lakleurtan ita nia Maun Bo’ot Xanana nu’udar Lider historiku, Aman nasaun nian sei to’o iha ita nia le’et. Maun Bo’ot Xanana sei bolu ninia alin ho ninia maluk sira seluk, tu’ur hamutuk jere situsaun ida ne’e,” katak Lere hodi hatutan.
Hosi lider historiku sira nia tu’ur hamutuk ne’e para labele mosu fali krizi hanesan esperensia iha pasadu. Hosi sala pasadu mai ita Timor-oan aprende. No sala pasadu maka ita nia mestri hanorin tiha ona desde tinan 1976 to’o tinan 2016. Sala ita nia lider sira ne’e deit.
Ba povu ki’ik sira Lere husu para labele sunu malu hosi facebook para hamanas nafatin situasaun. Maibé nia husu ba hotu-hotu tantu lider luta nain, lider historiku to’o povu ki’ik sira para kontribui ba garante estabilidade seguransa. Idak-idak hakmatek iha nia servisu. Hosik lider sira maka resolve politika lideransa nian.
“Ami nu’udar forsas armadas, apelu ba ita nia komunidade no joventude sira katak husik ita nia lider sira ho sira nia maturidade no ho responsabilidade resolve sira nia problema,” husu Xefe Estadu Maior Jeneral F-FDTL ne’e.
Hatan konaba rezultadu hasoru malu ho Prezidente Repúblika, Lú Olo, hatan Lere, Prezidente husu ba Forsas Armadas no PNTL atu kumpri nia dever no misaun ne’ebé maka Konstituisaun haruka ho neutru. Se’e maka inklina iha partidu ka organizasaun, komandu tenki toma medida.
*media one timor
No comments:
Post a Comment