Kontinua leilaun kareta Prado no sosa fali kareta foun

Konsellu Administrativa Parlamentu Nasionál (KAPN) deside ona atu kontinua halo alienasaun ba kareta Prado ba deputadu III lejislatura, no deside atu sosa fali kareta foun ba deputadu IV lejislatura.

Prezidenti Parlamentu Nasionál (PN), Aniceto Guterres, hateten, KAPN hasai ona desizaun ida atu kontinua ho alienasaun kareta Prado III lejislatura nian.

“Desizaun ida ne’e, inklui mós sosa kareta foun, maibé sosa kareta foun ne’e, la’os desizaun foun, tanba lejislatura anterior ne’e aprova tiha ona orsamentu atu sosa kareta foun, no orsamentu ne’e sai tiha ona lei mak lei orsamentu Jeral Estadu 2017 nian,”afirma Aniceto Guterres ba jornalista sira iha PN, Tersa (03/10).

Nia haktuir, Konsellu Administrasaun PN hamutuk ho meja PN sei hamutuk atu implementa desizaun ida ne’e.

“Konsellu Administrasaun nia desizaun importante mak atu halo alienasaun ba kareta prado tuan, maibé ho presu ne’ebé justu tuir lei ne’ebé vigora ona,”katak Aniceto.

Nia esklarese, PN seidauk iha lei ruma kona ba alienasaun, entaun alienasaun kareta Prado sira ne’e sei la’o tuir rejime jeral Estadu nian.

Tanba ne’e, Konsellu Administrasaun PN nian fó hanoin ba meja PN atu kumpri lei ida ne’e, maibé tenki ajusta didiak nia presu.

“Klaru katak, Prado kareta ne’ebé ho kualidade, maibé se ita kaer ba prinsipiu ida katak, ita hetan kareta ida ne’ebé kualidade diak ho presu ida ne’ebé ki’ik, ida ne’e mak justu liu,” relata Aniceto.

Nia afirma, Konsellu Administrasaun no Meja PN seidauk define marka foun PN ne’ebé mak atu sosa ba deputadau IV lejislatura, maibé kareta ne’e tenki kualidadeho presu ne’ebé justu, tanba deputadu sira la’os atu halo servisu iha capital Dili de’it, maibé tenki halo fiskalizasaun to’o area rural.

Aniceto esklarese, ba kareta III lejislatura nian ne’ebé mak eis deputadu sira seidauk hatama fali ba PN ne’e, meja PN sei dada hotu atu halo alienasaun.

“Desizaun Konsellu Administrasaun nian mós hatete klaru ona katak, tenki dada hotu kareta sira ne’e, maibé tenki ho maneira ne’ebé diak, tanba sira mós eis deputadu/a. se ita hakarak tratamentu igual, entaun ita tenki uza maneira ne’ebé diak,” katak Aniceto.

Nia dehan, agora dadauk deputadu 20 de’it mak entrega fali ona sira-nia kareta ba PN, maibé restu seidauk.

Aniceto informa, alienasaun ba kareta Prado III lejislatura nian ne’e sei hahú bainhira kareta foun IV lejislatura nian to’o mai.

*gmntv.tl