Koligasaun la konsege konvense, Opozisaun sei vota kontra tan programa Governu

Prezidenti bankada KHUNTO, Luis Roberto, deklara, bainhira partidu koligasaun (FRETILIN-PD) la konsege konvense líder másimu Partidu CNRT, PLP no KHUNTO, opozisaun sei vota kontra tan programa VII Governu nian ba daruak.

Luis esplika, Koligasaun presija konvense líder opozisaun, tanba desizaun hotu ne’ebé deputadu opozisaun ba IV lejislatura foti iha parlamentu nasional, tun hosi líder másimu partidu nian.

“Ita haree fila fali ba aprezentasaun programa governu ne’ebé hetan rejeita, segundu mai mós ha’u hanoin katak ita haree to’ok, depende fali ba Primeiru Ministru ona, hamutuk ho nia membru karik iha kompetensia negosiasaun ho ami-nia altu lideransa sira partidu nian simu malu no la’o diak, mai fila-fali ami mós ezekuta orden ona, maibe la konsege maka programa ne’e sei la pasa,”haktuir Prezidenti bankada KHUNTO, Luis Roberto, ba jornalista sira iha Parlamentu Nasional, Sesta (27/10/2017).

Iha sorin seluk, Prezidenti bankada FRETILIN, Francisco Branco, informa, governu halo esforsu hela hodi akomoda ezijensia sira ne’ebé bankada opozisaun sira hato’o.

“Aprezentasaun programa ba daruak ne’e sei ho dadus kompletu, ho montante orsamentu,  hodi responde ba ezijensia sira ne’e,” katak Francisco.

Branco realsa, bankada koligasaun FRETILIN ho Partidu Demokratiku (PD), prontu konvense ho líder partidu hotu, tanba interese Estadu nian, la’os interese grupu nian.

Antes ne’e, programa VII Governu ne’ebé lidera husi Primeiru Ministru, Mari Alkatiri, hetan sumba iha Parlamentu Nasional, tanba deputadu Opozisaun Maioria Parlamentar (OMP) hato’o mosaun rejeisaun, tamba bankada OMP konsidera VII Governu forma ho minoritariu ne’ebé sei la garante estabilidade Governativa ba tinan lima nia laran. Nune’e mosaun rejeisaun ne’e rasik pasa ho votus a favor 35, kontra 30 no abstensaun 0.

@gmntv.tl