Igreja Konsidera OMP Laiha Sentidu ba Povu Nia Moris

Dinámika polítika ne’ebé hala’o iha Parlamentu Nasionál, liu husi diskusaun ba Programa VII Governu Konstitusionál, hatudu momoos ba públiku kona-ba oinsá deputadu sira hatudu hela ambisaun hakarak ukun, maibe laiha sentivu ba povu nia moris.

Haree ba hahalok husi ema hirak ne’ebé hanaran-aan reprezenta povu ne’e, Padre Domingos Soares ‘Maubere’ hateten, saida mak deputadu sira hatudu iha diskusaun Programa VII Governu nian nu’udar jestu ne’ebé hatudu ba povu hakarak atu ukun, la’ós sentidu ba povu nia moris.

“Ita nia reprezentante sira tuur iha Parlamentu ida-di'ak defende nia aan ho ambisaun hodi ukun, la hare ba sitasaun povu nian”, dehan nia, liu husi omilia bainhira dirije misa, iha Igreja Parókia Sagrada Korasaun de Jesus-Bekora, horisehik.

Nia hatutan, bainhira situasaun polítika namanas hela de'it, estabilidade pás iha nasaun ne’e sei menus ikus mai povu mak vítima lori krús todan.

Amu Maubere konsidera Governu ne’e nu’udar mákina Estadu nian, kuandu funsionáriu sira la simu osan, impaktu boot ba país ho povu ne’e, ikus mai ema hotu mate ba hamlaha.

Ne’e duni, husu ba ukun na'in sira tuur hamutuk hodi ko’alia ho konxiénsia atu lori povu ho nasaun ne’e moris pás armonia.

Amu Maubere konta, bainhira Amu Papa João Paulo II sama-ain iha Timor, alerta ba povu tomak katak “imi mak masin no naroman ba nasaun ne’e”. Ho lia-hirak ne’e Igreja Katólika husu ba lider nasaun nian fó liman ba malu, nune’e povu Timor tenke hakmatek atu nasaun ne’e moris ho pás estabilidade nia laran.

Tanba ne’e, Igreja Katólika husu ba timoroan tomak iha fulan Rosário ne’e tenke reza makaas atu país ho povu ne’e moris hakmatek, labele mosu konflitu iha nasaun ne’e atu moris hakmatek pás ho armonia.

Husu mós ba ukun na’in sira tenke fó prioridade ba povu nia moris, la’ós haksesuk malu hodi atinji podér partidu polítika nian.

*independente.tl