Governu Prontu Selu Dividas TT

Governu prontu atu selu Dividas Timor Lelecom (TT), tanba nee parte governu sei halo  verifikasaun neebe klean,  bain hira atu selu.

Tuir Vice Ministru Obras Publiku Transporte e Komunikasaun (MOPTK) Inacio Freitas Moreira hatete, Governu prontu atu selu Dividas TT,  tanba nee parte governu sei halo verifikasaun neebe klean iha baze, bain hira atu selu tanba, TT nia estatutu agora sai  hanesan empreza privadu tanba nee, depende ba administrasaun ninian, kona ba dividas sei komprovas ho nunee bele selu.

Hau hanoin ami tenke halo duni verifikasaun iha baze antes atu selu, maibe governu ida nee kualker divida neebe iha, sei haree fila hodi tama iha prosesu legais hafoin bele halo desizaun,” dehan Inacio ba Jornalista Kinta (19/10/2017) iha Parlamentu Nasional (TL).

Nia mos informa liu tan katak, dividas ida nee sei rona informalmente deit, presiza tenke iha legal, no karta ruma hatete iha duni dividas maibe sei haree hodi deskute no buka solusaun atu selu.

Iha fatin hanesan, Deputadu Mericio Juvinal hatutan, divida TT nee hanesan todan ida. Tanba nee, husu ba governu atu selu tanba dividas nee iha ninia sansaun,  governu ida neebe deit iha dever tomak atu selu.

Ami preokupa tanba estadu ida maka ba deve fali, kompana privadu ida nee, hatun dignidade governu nee nian, maibe hanesan Deputadu husu nafatin ba governu responsabliza no selu atu nunee labele fo todan ba malu,” informa Mericiu.

Nia mos informa liu tan katak, povu atu labele fo liafuan devedor ba iha governu maka, hahu agora tenke buka ona solusaun no husu ba governu atu kumpri ninia dever oinsa bele selu dividas sira nee.

Nunee mos STL koko atu konfirma ho Asesor Timor Lelecom maibe, la kongese intervista tanba asesor TT okupadu hela ho servisu seluk.

*STL