Fó Lisensa Ba Hong Long Sein Kontratu Investimentu

Prezidente Komisaun D Asuntu Ekonomia no Dezenvolvimentu, Demétrio Amaral konsidera, kontratu ne’ebé Ministériu Agrikultura e Peskas (MAP) atribui ba kompañia Hong Long sein iha kontratu Investimentu ida ne’e lá seguru.

“Ha’u hakarak husu tansá la hahú kedan ho mós kontratu ba investimentu ida, tanba fó lisensa de’it, ba ha’u ladún seguru,” Deputadu Partidu Libertasaun Popular (PLP) Demétrio Amaral husu iha audiénsia ho Ministru Estadu no Ministru Agrikultura no Peska (MAP), Estanislau Aleixo da Silva iha plenária, ohin.

Tuir nia rede ne’ebé atu hakail ikan tuir konvensaun mar (tasi) internasionál autoriza 10.5 kilo metru enkuantu rede ne’ebé kompañia Hong Long uza ne’e nia  porsentu 90 kaptasaun ikan Tubaraun.

Nune’e mós iha lista espésie iha aneksu espésie protejida sira  ita tau tamañu ikan ne’ebé sira bele kaer. Maibé realidade nota katak Tubaraun bebé (ki’ik) sira mós kaer hotu, tanba laiha kondisaun ruma atu halo limitasaun tamañu sira atu kaer.

“Tanba sá mak lá halo limitasaun mós ba tamañu sira?,”  nia kestiona. No kontinua dehan, “Tanba selebra kontratu ida, iha kontratu ne’e nia laran bele tau kedan konteúdu sira ne’ebé ita hakarak atu proteje Governu Timor-Leste nia interese, kompañia nia interese no proteje mós karik kompañia lokál balun ne’ebé parseria ho sira iha prosesu ne’e atu nune’e parte hotu bele uza baze ida bainhira mosu konflitu entre parte sira, iha baze ba halo referénsia la’ós de’it lei maibé kontratu ne’ebé asina entre parte.”

Iha fatin hanesan, Deputada CNRT Bríjida Correia, reforsa, nia konkorda ho intensaun Governu nian atu fó lisensa investimentu ba kompañia atu diversifika ekonomia no hatama reseita ba Governu maibé tenke haree impaktu husi lisensa ida ne’e ba ambiente no bio diversidade, basa Bio diversidade mak hetan estragus tenke gasta osan boot atu halo investimentu hodi rekupera fali nune’e husu ba Ministru atu tetu asuntu ne’e.

Liga ho lisensa ida ne’e atu husu oinsá kontrolu ita-nia tékniku iha ró laran, sira-nia parser ka relatóriu oinsá? To’o ema hetan ona mak foin ita hotu preokupa ka ita-boot sira hetan relatóriu husi sira semanalmente, mensalmente ba sira-nia kontrolu liuliu ita-nia maluk sira ne’ebé ita-boot sira tau iha ró laran hodi servisu hamutuk ho kompañia ida ne’e.

Hatán ba deklarasaun hirak ne’e, Ministru Estadu no Ministru Agrikultura no Peska, Estanislau Aleixo da Silva iha PN esplika katak, kompañia ne’e sei halo investimentu la’ós de’it halo atividade peska iha tasi-mane maibé atu halo indústria peskeira.

Bainhira ministériu atu fó lisensa presizamente para proteje rekursu naturál tanba haree katak peska ilegál barak demais ona, kapasidade atu bá kontrolu laiha tanba iha ró barak mak peska iha tasi-mane.

“Ita iha integradu iha área alta bio diversidade. Hanesan membru Governu iha responsabilidade para hola desizaun. Desizaun ne’ebé ami halo sein interese, interese prinsipál ho peska ilegál ne’ebé iha ita-nia tasi-mane, laiha tan intensaun seluk,” Estanislau esplika

Kona-bá lisensa nia dehan, tuir prosedimentu basa antes hola desizaun dahuluk kompañia hatama proposta, tékniku sira halo avaliasaun hotu foin hola desizaun.

*tatoli.tl