Deputadu Arão lamenta, utilizador MedSos provoka situasaun

Xefi bankada CNRT,  Arão Noe de Jesus Amaral, lamenta ho servisu utilizador Media Sosial (MedSos) sira ne’ebé fo sai informasaun falsu hodi provoka situasaun.

Deputadu Arão Noe, relata lamentasaun ne’e, relasiona ho utilizador Facebook ne’ebé kopia tópiku notisia jornal nian,  hatama iha media sosial sira la ho’o liafuan kompletu hodi provoka ema atu insulta fontes ne’ebé ko’alia.

“Ha’u kestiona ne’e ho notisia tópiku sira ne’ebé ema kopia tau iha Facebook ne’ebé provoka de’it situasaun. Ha’u laliga ba media em jeral, maibe liga ba profisionalismu  ema sira ne’ebé kopia tun-sae ne’e, ne’epara halo kopia karik bele halo kompletu, atu nune’e ema bele lee kompletu, labele kopia rohan de’it hodi provoka situasaun ladiak iha ne’eba, maibe la’os liga ba profesional em jeral jornalista nian, maibe barak liu hosi públiku ne’ebé foti de’it notisia nia tópiku hodi tau iha Facebook halo ema tolok malu no insulta malu tanba de’it notisia la kompletu,”hateten Arão Noe Amaral ba jornalista sira iha Parlamentu Nasional, Segunda (09/10/2017).

Arão Noe afirma, relasiona ho asuntu ne’e, nia parte konsidera la’os sala media profesional sira nian, hanesan media imprime no eletronika.

“Ba ha’u, notisia husi media Radio, Jornal no TV la sala buat ida, tanba sira hakerek ho kompletu. Ha’u lamenta oituan mak ema balun ne’ebé kopia liafuan sira ne’e tau iha Facebook, maibe la tau kompletu, saída mak ema ko’alia,”dehan Arão.

Reprezentante povu iha uma fukun PN ne’e mós husu ba públiku atu bele tau kompletu wainhira kopia notísia ruma, atu nune’e lee nain sira bele kompriende no la hamosu emosaun públiku nian.

*gmntv.tl