CNRT sei la apoiu Agio Pereira iha VII Governu

Partidu Congresso Nacional de Reconstrucção Timorense (CNRT), sei la fo apoiu máximu ba Agio Pereira iha VII Governu konstituisional nu’udar independente.

“Nia hakarak ba ne’e konforme, ami la preokupa. Tanba nia hanesan militante baibain de’it, maibe ba labele lori partidu nia naran, no ami promete katak sei la fo apoiu ba nia, iha nia mandatu tomak,  tanba nia ba hanesan pesoal, ne’e ninia direitu, tanba ne’e partidu laiha komprometidu relasaun ho ninia involvimentu iha Governu,”dehan Prezidenti bankada CNRT, Arão Noe Amaral ba jornalista sira iha Parlamentu Nasional, Kuarta (04/10/2017).

Deputadu Arão Noe apela, CNRT sei la fo sansaun ruma ba pozisaun Agio Pereira nian, tanba  hanesan militante baibain no la inklina iha estrutura partidu nian.

“CNRT antes ne’e deklara ona katak opozisaun, no CNRT mós deklara ona, seila autoriza ninia kuadrus  ka militante ruma ba partisipa iha Governu ho karakter privadu, ne’e ninia direitu hanesan sidadaun, maibe la’os hanesan membru partidu CNRT nian,    Agio Pereira ba governu hanesan individu, nia mós hanesan militante ida iha partidu, ne’e nia direitu,  maibe la fo autorizasaun, tanba ne’e partidu sei la responsabiliza ninia servisu iha Governu,”afirma Xefi bankada CNRT ne’e.

Entretantu, kuadru partidu CNRT, Agio Pereira hanesan militante baibain iha partidu CNRT, asume kargu iha VII Governu kostitusional hanesan Ministru Adjuntu Primeiru Ministru no Ministru Delimitasaun Fronteira.

Antes ne’e, CNRT deklara ona sei mantein pozisaun hanesan opozisaun iha Parlamentu Nasional, tanba ne’e sei la  autoriza kuadrus partidu ida atu ba asume kargu iha Governu  konstitusional dahitu nian.

*gmntv.tl