CNRT Konsidera Laiha Dalan Diskute Orsamentu Retifikativu - ITL | BUAT HOTU KONA BA TIMOR-LESTE

ATUALIDADE

Post Top Ad

CNRT Konsidera Laiha Dalan Diskute Orsamentu Retifikativu

Orsamentu Retifikativu halo atu hamenus ka ajusta de'it Orsamentu Jerál Estadu (OJE) tinan fiskál, hodi responde ba nesesidade ne'ebé iha.

OJE 2017 ne’ebé la'o daudaun no Governu Jestaun bele utiliza to'o Dezembru 2017. Karik liu 2017 sei bele aplika mós duadesimu ba despeza re-korrente ba fulan Janeiru no Fevereiru 2018, karik OJE 2018 nian seidauk iha.

Maski nune’e, tuir previzaun VII Governu nian orsamentu duadesimu sei labele finansia to’o tinan oin. Ne’e duni hakarak hamosu Orsamentu Retifikativu hodi prevé krize finanseiru iha instituisaun publika.

Maibé razaun ne’e hetan kontra-atake husi Partidu CNRT. Tuir sira, ezekusaun OJE to'o loron 29 Outubru 2017 foin atinji 74% (portál transparénsia), nune'e sei iha osan atu gasta.

CNRT rasik konsidera Lei Orsamentu no Jestaun Finanseira mós fó dalan atu halo transferénsia entre kategoria Bens e Servisu, Kapitál Menór no Transferénsia Publika. Nune'e, la presiza Orsamentu Retifikativu atu ajusta, maibé bele halo transferénsia ba OJE 2017.

Komunikadu imprensa partidu CNRT ne’ebé diáriu ne’e asesu hateten, ajustamentu halo de'it tuir estrutura orsamentál ne'ebé la'o daudaun. Labele introdús fali ba projetu foun ka ministériu foun, inklui saláriu ba pasta ministru foun nia.

Ne’e duni, Parlamentu Nasionál labele aprova aumentu ne'ebé laiha justifikasaun, maibé halo ajustamentu de'it. Bele halo mós ba pagamentu projetu ne’ebé komprometidu ona, maibé la'ós atu aumenta tuir polítika Governu Jestaun nian.

Tanba ne’e, legalmente Governu labele hatama hodi aprova Orsamentu Retifikativu molok programa Governu ne'e rasik aprovadu ona. Governu iha lejitimidade atu hatama proposta lei ba Parlamentu no legalmente, Orsamentu Retifikativu mós nu’udar proposta Lei ne'ebé presiza aprovasaun husi PN.

CNRT konsidera Orsamentu Retifikativu tuir nia natureza to'o de'it Dezembru 2017. Nune'e, husu ba funsionáriu públiku, membru PNTL no membru F-FDTL, profesór, veteranu no antigu kombatente no povu tomak atu labele laran ta'uk ho rejeisaun Orsamentu Retifikativu ne'ebé sei hatama ba Parlamentu, tanba laiha dalan husi aspetu legál tanba bele inkonstitusionál.


Orsamentu 2017 nian mós sei la’o hela no foin gasta balun no sei falta 30% maka seidauk gasta hotu. Tanba ne’e, saláriu sei simu nafatin no mákina Estadu sei kontinua funsiona ho OJE 2017.

@independente.tl

No comments:

Post a Comment