AMP Selebra Vitoria Rejesaun ba Programa Governo iha Hotel Novo Turizmu

Hodi kalan, hafoin debate Programa Governo no vota ba mosaun rejesaun iha Parlementu Nasional, Aliansi Maioria Parlementar (AMP) selebra sira nia vitoria iha Hotel Novo Turizmu.

Tuir informasaun hosi fontes kredibel iha Hotel Novo Turizmo hatete katak Deptadu sira hosi AMP halo selebrasaun ba vitoria ne’ebe sira hetan iha Parlementu Nasional.

Deputadu Parlementu ida hosi AMP ne’ebe lakohi temi nia naran, hato’o ba TAFARA.TL katak deputadu sira selebra duni iha ne’eba no toba mos iha hotel refere.

Jornalista TAFARA.TL koko kontaktu ba deputadu PLP no CNRT balun maibe sira la atende telefone.

Votasaun ba mosaun rejesaun halo horiseik iha uma fukun Parlementu Nasional. Iha votasaun ne’e Deputadu 35 hosi CNRT, PLP, no P-KHUNTO mak afavor no 30  hosi Fretilin mak kontra.

Ho nune’e Programa Governo fo hikas ba governo hodi hadiak no lori hikas ba aprezenta iha loron 30 nia laran. Maibe Premeiru Ministru Marí Alkatiri hatete ona sei la lori Programa Governo nian ba dala rua.

*tafara.tl