“Hau ezizi ba membru governu no instituisaun governu, atu hatudu servisu ho professionalismu, labele lori fali politika partidu nian mai iha administrasaun publika no governu laran. Governu ba ema hotu, ukun ba ema hotu, ukun para atu responde povu nia halerik no povu nia hakarak ida ne’e mak governu” Alkatiri.
Iha enkotnu entre Premeiru Ministru e Minstro do Desenvolvimento e de Reforma Institucional Dr. Mari Alkatiri, ho instituisaun governu no inklui Gabinete Premeiru Ministru, ba participant tomak Dr. Mari hateten katak, VII Governu Konstituisional mai ho visaun hodi hadia, maibe laos objetivu atu truka ema, bainhira ema ida bele sai professional, presija duni sira atu kontinua servisu.
“Hadia mak politika, hadia mak planu, programa no sistema. Ida ne’e mak VII Governu hakarak halo, maske ita lori tempu oituan. Sorte VI Governu halo mos estudu, skill no diagnostika barak ona, ne’e bele dehan fasilita ona VII governu para atu halo abordazen ba hadia”, esplika Mari Alkatiri.
Liu hosi enkontru ba dala uluk, ne’ebe hala’o iha Palacio Nobre Lahane, loron 18/09 ezizi ba membru governu no instituisaun governu atu hatudu servisu ho professionalismu, labele lori fali politika partidu nian mai iha administrasaun publika, no politika partidu nian iha governu laran. Governu ba ema hotu, ukun ba ema hotu, ukun para atu responde povu nia halerik no povu nia hakarak ida ne’e mak governu.
Tuir esplikasaun hosi Dr. Mari katak, iha semana ne’e nia laran, governu hotu tenke hetan ona tomada de posse, tanba Prezidente da Republika mos husu atu bele kompleta ona membru governu iha semana ne’e nia laran.
“Lalika preokupa, ita hotu hamutuk mak buka hatene saida mak la dun diak, ita hadia no presija ita harii. Laiha presigisaun ba ema ida, laiha vigansa ba ema ida. Uluk kedas Fretilin iha opozisaun, Fretilin kontribui, agora hanesan Premeiru Ministru ema Fretilin maibe governu laos Fretilin mesak no sei inklui sira seluk, objetivu atu inklui laos atu esklui, ida ne’e mak hau bele garante”, hateten Mari Alkatiri ba partisipante tomak.
Iha parte sorin komunidade Lahane osidental, Linda Ximenes ba TAFARA.TL hateten katak, nudar komunidade sente kontente tanba iha ona governu foun. Hanesan komunidade iha ezijensia ne’ebe governu ida ne’e presija halo, atu bele hadia ekonomia povu nian, atu bele sai hosi mukit.
“Bainhira ita ukun an, hakarak hasai povu hosi ukun colonial, agora hanesan povu kontinua ezizi atu bele sai hosi mukit, ho nune’e mehi povu nian durante ne’e bele responde. Ami fo fiar ba governu ida ne’e atu labele taka matan ba ami nia halerik”, tenik Laurinda ho esperansa boot.
Iha enkontru ida, Eiz Premeiru Minsitru VI Governu Konstituisional entrega relatorio Governasaun nian ba Premeiru Minstru Dr. Mari Alkatiri. Iha partes sorin, Director Executive Centru Nasional Chega (CNC), Hugo Fernandes, ne’ebe marka prezensa, entrega relatoriu fulan tolu nian no brosura kona ba CNC nian ba Premeiru Minsitru.
*tafara.tl
*tafara.tl
No comments:
Post a Comment