PLP Prontu Uza Motór, Vota Prado

Bankada Parlamentár lima ne’ebé oras ne’e daudaun iha Uma Fukun Parlamentu Nasionál, liu husi reuniaun Konsellu Administrativu fó votu unanimidade ba sosa karreta foun ho marka Prado, iha Sesta (22/9).

Konsellu Administrativu Parlamentu Nasionál nian reprezenta husi kada bankada. Husi Partidu FRETILIN reprezenta husi deputadu Aurélio Freitas, CNRT Deputada, Brígida Correia, PLP Deputadu, Mericio Akara, PD Deputadu, Manuel Carvalho ‘Lito Rambo’ no reprezentante husi bankada KHUNTO.

Fonte prinsipál diáriu ne’e nian iha Parlamentu Nasionál hateten, iha prosesu diskusaun no votasaun ne’e pontu rua importante mak deputadu sira define. Kona-ba kontinuasaun alienasaun ba karreta Prado antigu.

Maski nune’e, karreta sira ne’ebé deputadu anteriór sira lori ona ba uma sei rekolla hotu, hafoin bele halo analiza hodi define ninia presu ne’ebé razoavel. Presu ne’ebé determina entre $12.000 to’o $20.000.

Pontu importante seluk ne’ebé aprova maka reprezentante bankada sira ne’e hotu-hotu a favór ba sosa karreta foun.

Prezidente Bankada KHUNTO, Luis Gaspar da Silva hateten, deputadu sira la ezije karreta foun ka tuan, maibé hakarak atu halo tratamentu iguál entre deputadu atuál ho anteriór.
Nia hatutan, hanesan órgaun lejizladór atu hala’o knaar fikalizasaun iha territóriu laran tomak presiza karreta ne'ebé iha kondisaun tuir situasaun jeografia nasaun nian, atu bele fó kondisaun ba deputadu sira hodi hala’o knaar.

Nia hatutan, atu sosa karreta foun ka tuan ne’e depende ona ba konsellu administrasaun parlamentár, tanba ne’e desizaun iha hotu sira nia liman.

Iha fatin hanesan, Prezidente Bankada PLP, Fidelis Magalhães hatete, hanesan membru parlamentu nasionál prontu atu hala’o knaar fiskalizasaun, tanba ne’e atu sa’e karreta ka motór prontu la’o.
Nia hatutan, ohin loron parlamentu nasionál seidauk fasilita karreta, maibé daudaun ne’e hala’o ona fiskalizasaun individuál bainhira ba vizita viajen ba ida-idak nia munisípiu.

Alende ne’e, Eis Prezidente Parlamentu Nasionál, Adérito Hugo da Costa hatete, kestaun kona-ba karreta ne’e kompeténsia ba Konsellu Administrasaun mak atu halo desizaun, tanba situasaun sira iha pasada hatudu ona kuandu prosesu hotu foin la’o ne’e buat hotu neineik.

Antes ne’e, Prezidente Bankada PLP, Fidelis Magalhães rasik deklara katak deputadu PLP la presiza karreta foun atu ba halo fiskalizasaun, tanba karreta tuan balun sei iha kondisaun di'ak hodi bele uza. Nune’e, prontu mós atu uza motór.

Nune’e, mosu imajen ne’ebé mosu média sosiál Deputadu PLP sira balun uza motorizada.
Maski nune’e, iha reuniaun Konsellu Administrasaun PN nian, Bankada PLP mós fó votu a favór ba sosa karreta foun ba deputadu foun na’in 65 ne’e.

*independent.tl