PLP Konsidera FRETILIN Uza “Politika Janela” Dada Nia Ema

Relasiona ho individu membru Partidu Libertasaun Popular (PLP) ne’ebe involve iha VII Governu Konstitusional, lideransa PLP hanesan mos xefe bankada iha Parlamentu Nasional (PN) Fidelis Magalhaes konsidera politika ne’ebe partidu mais votadu FRETILIN uza hanesan “politika janela” hodi dada sira nia membru lideransa.

“Ladiak bainhira ita iha nasaun ida ne’e iha partidus politiku halo konseptasaun iha PN entre partidu profunda liu tan, maibe realidade partidu mais votadu ba buka koko para dada ami nia individu husi ami nia partidu, ida ne’e hau hanoin lolos labele halo hanesan ne’e, lolos presiza iha komunikasaun ba malu, se hanesan ne’e ba foti deit husi janela,” dehan Fidelis ba jornalista sira iha uma fukun PN, Tersa (26/09/2017).

Fidelis Magalhaes esklarese, lideransa PLP balun simu duni konvite hosi Partidu FRETILIN hodi involve iha kargu membru governu balun.

“Membru PLP nia balun hetan konvite husi partidu mais votadu hodi hamutuk iha ezekutivu, maibe sira dehan obrigadu ba konvite, ami la ba, tanba sira nia fiar metin ba politika partidu nian forti liu nune’e sira foti dezisaun hodi la ba,” dehan Fidelis.

Lider partidu ne’e konfirma katak los duni Jose Neves “Samala Rua” koalia ona ho Partidu FRETILIN hodi involve iha estrutura membru governu, maibe komunikasaun ne’e halo individualmente la liu hosi partidu.

*thetimor-news.com