Mosaun Sensura Hasoru Meza Parlamentu Tenke iha Razaun Fundamentu

Prezidente Parlamentu Nasionál, Dr. Aniceto Longuinhos Guterres hateten halo Mosaun Sensura hasoru Meza Parlamentu Nasionál ka Prezidente Parlamentu Nasionál tenke iha razaun fundamentu.

“Mosaun Sensura atu sensura saida? Mosaun Sensura ba saida de´it tenke iha fundamentu. Labele fundamentu ne´e tanba la gosta individu ida ne´e no ida ne´ebá,” Aniceto ko´alia kestaun ne´e ba jornalista sira iha Palásiu Prezidente Nicolau Lobato, Bairu-Pité, Dili, kuarta ne´e, bainhira husu ninia komentáriu kona-ba polémika Mosaun Sensura hasoru Meza Parlamentu tanba estrutura meza Parlamentu mai hosi bankada minoria kompostu hosi FRETILIN no PD kompara ho bankada maioria hosi CNRT, PLP no KHUNTO.

Nia esplika Mosaun Sensura ne´e mosu anaunser Prezidente Parlamentu komete erru grave ne´ebé afeta ba funsionamentu normál Parlamentu Nasionál nian. Tanba ne´e, nia hateten, nia la preokupa.

“Dezde maioria deside dehan tún ne´e bele tún maibé di´ak ba estabilidade polítika ka lae. Ne´e responsabilidade mós. Responsabilidade la´ós ba meza Parlamentu de´it maibé deputadu hotu-hotu, partidu polítiku hotu-hotu no sidadaun hotu-hotu.

Tuir Konstituisaun RDTL artigu 111 katak (1) Ho inisiativa ¼ deputadus ne’ebé sei hala’o hela kna´ar, Parlamentu Nasionál bele halo votu sensura ida ba Estadu, kona-ba nia programa ka buat seluk ne’ebe relevante ba interese nasionál no (2) Karik mosaun sensura la hetan apoiu, ba sira ne’ebé asina mosaun ne’e, labele aprezenta fali mosaun seluk, iha sesaun ne’ebé hanesan.

Enkuantu, kona-ba objetivu soru-mutu ho Prezidente Repúblika, Dr. Francisco Guterres Lú Olo, ko´alia kona-ba funsionamentu Parlamentu Nasionál.

 “Prezidente Repúblika tuir konstituisaun iha kompeténsia atu garante funsionamentu normál Estadu Demokrátiku, tanba ne´e Prezidente Repúblika presiza akompaña direta liu-liu lala´ok funsionamentu Parlamentu Nasionál ninian,” Aniceto informa.

Nia haktuir katak Parlamentu Nasionál hahú funsiona tiha ona tanba estrutura no órgaun sira ne´ebé halo Parlamentu funsiona ne´e maka Meza Parlamentu iha hotu ona, Komisaun Espesializadas estabelese hotu ona, meza komisaun estabelesidu, hili ona grupu nasionais ba Uniaun Interparlamentár CPLP no halo plenária hamutuk dahaat ona.

*tatoli.tl