KHUNTO “Lakohi” Asina Akordu Plataforma Formasaun Governu

Formasaun VII Governu Konstitusional  ne’ebe partidu tolu, FRETILIN, PD no KHUNTO  mak konkorda ona hodi halo koligasaun, ikus Partidu KHUNTO “Lakohi” asina fali akordu plataforma ba formasaun governu ne’ebe lolos partidu tolu ne’e asina ohin (13/09/2017).

Maski la mosu iha asina plataforma ba formasaun governu nian, Partidu FRETILIN ho PD kontinua vansa hodi asina duni plataforma ne’ebe hafoin asina lori kedan ba Prezidenti Republika, Francisco Guterres Lu-Olo hodi hare’e legalidade ba formasaun governu nian ne’e.

Sekretraiu Jeral Partidu FRETILIN, Mari Alkatiri iha Sede CCF informa katak maski la temi Partidu KHUNTO nia naran iha esplikasaun, nia esklarese katak partidu balun iha sira nia koligasaun la marka prezensa tamba iha hela problema internu.

““Politiku mak hanesan ne’e duni partidu ida-idak iha nia intrese rasik, balun hakarak tama maibe iha nia problema internal balun, entaun tenke presiza rezolve uluk lai, maibe ikus PD hanesan partidu ida ne’ebe iha hanoin no prinsipiu katak hakarak hamutuk hodi servi,” dehan Mari Alkatiri.

Maski la asina plataforma ba formasaun governu nian, FRETILIN kontinua garante ba Partidu KHUNTO hafoin resolve problema interna bele hamutuk hikas ho sira (FRETILIN no PD).

Iha fatin hanesan, Prezidenti PD, Mariano Assanami Sabino hateten, inprinsipiu PD kontinua hamutuk ho partidu ne’ebe deit hodi forma governu.

 “PD nia pozisaun mak ne’e hahu husi inisiu to’o agora, sempre dehan katak ba o Timor hau maubere oan pronto servi, ne’e duni PD halibur iha 2001 atu hamutuk hodi ukun no lori nasaun ne’e ba oin,” dehan Assanami.

Asina plataforma ba formasaun governu nian ne’e hetan sasin hosi eis Prezidenti Republika, Jose Ramos Horta ho Abilio Araujo eis Prezidenti Partidu Nasional Timorense (PNT).

Antes ne’e iha loron hirak liu ba, Komite Sentreal FRETILIN (CCF) desidi ona katak Sekretariu Jeral Mari Alkatiri mak sei asumi kargu Primeiru Ministru ba VII Governu Konstitusional.

Iha I Governu Konstitusional, Mari Alkatiri sai Primeiru Ministru maibe nia ukun la to’o mandatu hotu tamba hetan protesta makas hosi povu Timor-Leste ba nia lideransa hodi halo nia rezigna an iha 2006. Nia pozisaun troka kedan hosi Jose Ramos Horta, maibe antes mandate remata iha 2007, Jose Ramos Horta ne’ebe kandidata an ba Prezidenti Republika 2007-2012 troka fali ho Estanislau da Silva.

Iha eleisaun parlamentar, FRETILIN sai partidu mais votadu ho kadeira 23 tuir kedan CNRT (22), PLP (8), PD (7) no KHUNTO (5).

*thetimornews.com