KAMGT Husu Estadu Atu Valoriza Artista Dekade Komesa 70 to 90

“Hanesan artista ami nia kontribuisaun ba funu ne’e mak liu husi muzika, ho liafuan  fo korajem, konsola ema, fo laran malirin ba ema, atu Povu ne’ebe iha intimidasaun, ameasa nia laran bele iha nafatin forsa. kria Lei ida ne’ebe mak forte, hodi kombate servisu produsaun muzikas piratarias [Pembajakan. Red]”.

Lia ne’e hato’o husi porta voz Grupu Klibur Artistas Muzikus Gerasaun Tuan [KAMGT], Anito Matos hafoin enkontru ho Prezidente Republika, Dr. Francisco Guterres Lú Olo, iha Palacio Prezidente, Aitarak-Laran, Dili, 20/09/2017.

Objetivu husi enkontru refere katak, KAMGT, hakarak hato’o hanoin, halerik, oinsa estadu fo rekoñesimentu ba artistas, liu-liu artista sira ne’ebe durante tempu luta ba libertasaun patria, liu husi muzika espresa sira nia sentimentus hodi fo korajem, konsola Povu ne’ebe iha intimidasaun, ameasa nia laran bele iha nafatin forsa.

 “Ami hato’o ami nia preokupasaun no ami nia pensamentu. Xefe Estadu bele hanoin, oinsa mak atu valoriza artisita liu-liu ba jerasaun tuan sira iha dekada komesa 70, 80 to’o 90 nian ne’e,” tenik Anito Matos.

Iha enkontru kuaze horas ida nia laran ne’e, grupu refere mos hato’o ba Xefe Estadu, atu bele fo hanoin ba Governu, Parlamentu Nasional hodi haree situasaun artista iha Timor, no oinsa kria Lei ida ne’ebe mak forte, hodi kombate servisu produsaun muzikas piratarias [Pembajakan. red] no harí organizasaun sensura hodi halo sensura ba muzika sira ne’ebe mak ofende ema nia privasidade. Tuir Grupu Klibur Artistas Muzikus Gerasaun Tuan nia haree, artista ohin loron halo sira nia gravasaun laiha sensura, nune’e iha muzika existe liafuan tolok, ofende Feto, insultus no seluk tan.

Anito Matos haktuir liu tan katak, Prezidente Republika iha hanoin oinsa fo mos knaar, biban ba artisita sira, pelu menus iha netik divertimentu iha fatin ruma. Entretantu  KAMGT mos iha hanoin oinsa atu halo gravasaun ba muzika sira, liu-liu muzika sira ne’ebe mak durante tempu funu artista sira halo, kona-ba luta libertasaun patria, sai album ida hodi oferese ba Estadu nu’udar patrimoniu Estadu hanesan lembransa ida no introdus karakter muzika Ema Timor.

*tafara.tl