Igreja Katólika La Konkorda Eleisaun Antesipada

Membru Igreja Katólika husu ba partidu polítiku sira ne’ebé hetan asentu iha Parlamentu Nasionál, liuliu opozisaun sira atu lalika soe tempu hodi hanoin eleisaun antesipada. Maibé oinsá bele kolabora hamutuk ho governu dezenvolve nasaun ne’e.

Padre Juvito do Rego hateten, la konkorda atu mosu eleisaun antesipada iha governasaun ne’e, tanba gastu orsamentu barak.

Povu mós baruk ona eleisaun, sira hakarak haree rezultadu husi dezenvolvimentu ne’ebé polítiku na’in sira atu halo.

Ne’e duni, lideransa partidu sira ne'ebé reprezenta povu iha uma fukun Parlamentu Nasionál tenke kolabora malu ho partidu rua ne'ebé forma Governu husik la’o oin. Atu nune’e, bele dezenvolve povu no rai ida ne’e.

“Ha'u la hanoin kona-ba eleisaun antesipa. Eleisaun antesipada ne’e gasta osan barak, tempu barak. Povu ne’e kolen ona atu halo buat sira ne’e”, dehan amu Juvito hafoin lori ekipa Chega hasoru Xefe Estadu, iha Palasiu Prezidensiál Ai-Tarak Laran, horisehik.

Ne’e duni, lideransa sira labele provoka tan situasaun ne’e ba fali krize ida. Tanbasá lakohi atu Governu ida ne’e atu ba oin hodi ba fali eleisaun antesipada.

Tanba ne’e, Pe. Juvito preokupa ho situasaun hanesan ne’e, barak gosta haree ema seluk nia aat no monu ba rai kuak sira basa liman kontente.

Tanba ne’e, nia apela atu timoroan tenke hadomi malu buka atu respeita malu hodi suporta malu atu dudu prosesu sira ne’e la'o di'ak ba oin.

*independente.tl