FRETILIN hakfodak ho dívida US$ 1.6 bilioens ■Metade OJE tinan 2 sei selu de’it tusan

Bankada FRETILIN iha Parlamentu Nasionál (PN), hakfodak ho dívida Estadu US$ 1.6 bilioens, tanba osan ne’e montante orsamentu Governu nian ba tinan ida.

Deputadu Aurelio Freitas, husi bankada FRETILIN hateten, iha fulan hira liu ba, Parlamentu Nasionál aprova orsamentu retifikativu ho montante US$ 320 milloens resin, atu selu dívidas Estadu nian, ho total 94 projetu.

“Maibé realidade, tuir informasaun ne’ebé mak iha, ita-nia dívidas ne’e, la’os selu tiha ona, maibé sei iha nafatin, pior liu tan sa’e ona ba US$ 1.6 bilioens. Agora dadauk ita-nia osan iha fundu petrolíferu US$ 16.5 bilioens, se ita hasai US$ 1.6 bilioens atu selu dívida sira ne’e, entaun hela de’it US$ 15. bilioens de’it ona,” katak Aurelio Freitas iha plenária PN, Tersa (19/09).

Nia afirma, husi 94 projetu ne’ebé mai husi Governu Aliansa Maioria Parlamentar (AMP), to’o mai Bloku Koligasaun nian, projetu 32 atu selu hotu, maibé nakfilak hotu ba projetu multi annual, mak hodi dívidas ne’e bo’ot hanesan ne’e.

“Se mak atu responsabiliza tusan hirak ne’e, Governu agora? Sim ida ne’e responsabilidade Estadu, no Governu agora tenki asume responsabilidade, maibé presiza mós ita haree, se mak halo ida ne’e. Se ita foti orsamentu US$ 1.5 bilioens hanesan tinan-tinan, previzaun atu selu tusan ne’e, to’o 2018,”relata Aurelio.

Tanba ne’e, Aurelio husu ba bankada hotu iha Parlamentu Nasionál hanoin didiak hodi haree kestaun ne’e, tanba dívidas Estadu ne’e bo’ot tebes.

“Entaun metade husi orsamentu Jeral Estadu kada tinan ne’e, ita selu tusan de’it, ida ne’e mak ita hotu nia preokupasaun,” tenik Aurelio.

*gmntv.tl