Fidelis: Hau Prontu Sae Motor ba PN

“Partidu Libertasaun Popular (PLP) mai ne’e, la preokupa ho kareta, hau motor mos iha, ne’ebe, hau kontente no prontu sae hodi mai Parlamentu Nasional (PN), konaba kareta foun, fundus laiha karik deputadu husi PLP bele aranja rasik sira nian”.

Lia hirak ne’e hato husi Xefe bankada PLP, Fidelis Magalhaes hodi hatan ba informasaun ne’ebe, fo sai husi sekretariadu Tekniku PN kona ba kareta foun ne’ebe prepara ba deputadu IV lejislatura.

Tuir informasaun ne’ebe espalla, bainhira sosa kareta  ba deputadu foun depennde ba deputadu sira hotu mak tenke foti desijaun hafoin bele sosa. Tanba ne’e xefe bankada PLP ne’e hatete, “PN hanesan orgaun soberania ida bainhira halo tiha ona desijaun relasiona ho kareta deputadu sira nian hakarak ka lakoi tenke kumpri lai foin mak deputadu sira iha PN halo fali desijaun,” dehan Fidelis.

Nia hatutan, PLP prontu nafatin atu sae kareta tuan ne’ebe deputadu III lejislatura sira durante ne’e uja,  nune’e bele kontinua fali sira nia servisu iha uma fukun PN durante mandate tinan lima (5).

Nune’e, nia husu sekretariadu tekniku PN, atu dada fila kareta hirak ne’ebe durante, deputadu III lejislatura sira uja tenke hotu no labele foti deit balu.

*thetimornews.com