Dom Virgilio: Labele Ansi Troka Lere

Bispu Dioseze Dili Dom Virgilio do Carmo da Silva, SDB kontinua apoiu Maijor Jeneral Lere Anan Timur hodi lidera F-FDTL kuandu jerasaun foun seidauk preparadu. Tan nee lalika ansi atu troka nia, maske tuir lei ninia mandatu sei remata iha fulan Outubru tinan nee.

Buat neebe importante mak governu tenke garante kontinuidade presiza ema neebe fiar, karik seidauk iha jerasaun foun preparadu, bele fo tan tempu ba Jeneral Lere kontinua lai, la bele ansi hodi nunee prepara jerasaun foun. Tanba nasaun nee presiza ema neebe mak iha kapasidade atu hatene kaer ukun no lei,”dehan Dom Virgilio ba Jornalista sira iha Lecidere Kuarta (27/09/2017).

Bibi atan Dioseze Dili nee hatutan, koalia kona ba mandatu Jeneral Lere Anan Timur nee  kompetensia ba Nai ulun sira neebe mak kaer lei atu interpreta lei ho diak hodi fo satisfasaun ba povu hotu. Maibe, atu kaer pasta ida nee presiza prepara ita nia ema neebe mak iha duni kualidade firme iha ita nia rain.

Iha fatin ketak tuir Deputadu Bankada CNRT Natalino dos Santos katak, haree ba mandatu Jeneral Lere nian neebe sei hotu iha fulan Outubru, hanesan deputadu no jerasaun foun ninia hanoin mak atu fo tan tempu ba Jeneral Lere atu asumi nafatin hodi prepara jerasaun foun atu substitui fatin ida nee.

Husi hau pesoal husu atu fo tan tempu ba Jeneral Lere asumi nafatin mandatu hodi lidera instituisaun F-FDTL, hodi prepara jerasaun foun ba oin lidera instituisaun defeza, tanba instituisaun nee importante tebes,” nia informa.

Deputadu nee informa, maibe nee kompetensia governu nian atu bele haree, karik iha lei fo dalan ka la fo dalan, ida nee governu mak tenke haree, karik lei la fo dalan maibe lei nee ema mak halo.

Nunee mos Prezidente Komisaun B, Fidelis Magalhaes hatete,  haree ba mandatu Jeneral Lere  nian, Iha tinan kotuk ba tempu  Eis Prezidente Taur  Matan Ruak nian ekstende ba tinan 2, neebe agora sei hotu iha fulan Outubru, maibe diak liu la lika komentar lai, tanba asuntu ida nee presiza haree ho kuidadu.

*STL