CNRT lahatene dívidas US$ 1.6 biloens

Bankada Opozisaun CNRT iha Parlamentu Nasionál, lahatene dívidas US$ 1.6 biloens ne’ebé FRETILIN levanta iha plenária PN semana kotuk, tanba iha livru orsamentu nian, laiha dívidas ho montante nebe Fretilin kestiona.

Deputadu Fernanda Lay husi bankada CNRT duvida ba perokupasaun FRETILIN nian tamba tusan governu nian ne’e, US$ 1.6 biloens ne’e CNRT rasik lahatene fontes husi dívidas nee.

“ Ha’u hakarak intende, tusan ne’e saida, tanba tuir Komisaun C nia haree katak, iha orsamentu Estadu, iha dívidas finanseiras, no dívidas naun finanseiras. Iha kontestu ida ne’e, ita tenki intende katak, saida mak dívida finanseiras, tanba tuir ami nia haree kona ba dívida finanseira iha livru OJE 2017 númeru 1, ho fundu infra-estruturas hato’o katak, dívida finanseira ne’e mak, Governu halo impréstimu ba instituisaun internasionál, maibé ida ne’e mós Parlamentu autoriza,” relata Fernanda Lay iha plenária PN, Segunda (25/09).

Nia haktuir, dívidas naun finanseiras ne’e, atu finansia saida mós, PN tenki hatene katak, dívidas naun finanseira ne’e, atu finansia projetu infra-estrutra sira ne’ebé iha ona, no mós dívidas naun finaseira seluk mak, despezas korentes.

Nia esplika, despezas korentes ne’e, tusan ne’ebé halo ba servisu sira ne’ebé fó ba Estadu, inklui mós dívidas ba Timor Telecom.

“ Ha’u hakarak intende, dívidas US$ 1.6 biloens ne’e, mai husi ne’ebé?, ladun diak  kuandu ita foti tau hamutuk de’it,” duivida deputada nee.

Alende ne’e, deputau Duarte Nunes, husi bankada CNRT hateten, dívidas ne’ebé mak bankada FRETILIN levanta iha plenária foin lalais ne’e tenki haree didiak.

“Ita dehan dívidas, signifika ita iha ona kompromisu, maibé ema nia direitu ita seidauk selu. Dívidas finanseiras, ne’e impréstimu ne’ebé ita halo, hodi ajuda dezenvolve ita nia rai ne’e,” tenik nia.

Duarte Nunes esklarese, osan impréstimu ne’ebé Estadu halo ne’e se la’o hela, tamba nee labele esklarese ida ba ida, tanba ida ne’e Parlamentu Nasionál mós konkorda ho osan impréstimu.

Nia hatutan, iha 2013 to’o 2015, iha dekreitu lei ida sai husi governu, ne’ebé fó autorizasaun para emprezariu sira hatutan projetu sira ne’e, mak foin governu aprova hodi halo pagamentu.

Alende ne’e, deputadu Osorio Florindo husi bankada FRETILIN hateten, dívidas ne’e bo’ot tebes, tanba ne’e, bankada hotu iha PN tenki fó atensaun.

“Ha’u hanoin ita tenki halo los sasan balu, para ba oin ita sai husi situasaun ida dívida sira ne’e.  hanesan deputadu, ha’u hanoin ita hotu tenki hamutuk atu haree para ita sai husi situasaun ida ne’e,” tenik Osorio.

Nia esklarese, kuandu agrupa hotu orsamentu husi 2013 mai to’o 2016, númeru dívidas ne’e bo’ot liu mak US$ 1.6 biloens.

*gmntv.tl