Ajénsia TATOLI, Ita Sei Hadi’a Liu Tan

Ministru Prezidensiál Konsellu Ministru VII governu Konstitusionál, Adriano do Nascimento enkoraja redasaun Tatoli.tl atu kontinua servisu ho professional hodi serve informasaun ba públiku atu sira bele akompaña prosesu konstrusaun estadu nian.

“Imi hakás an, professionaliza imi nia an, professionaliza mos instituisaun hodi fó informasaun ba públiku. Ita sei haree atu hadi’a, Ha’u sei la sobu,” Ministru Adriano Nascimento fó hanoin ba Redasaun Ajénsia Tatoli, bainhira hala’o primeira vizita iha edifísiu Tatoli, iha Palásiu do Governu, foin lalais ne’e.

Iha fatin hanesan nia dehan iha tempu besik sei buka konsentra hodi haree memória institusionál ne’ebé husik hela ona hosi governu antrior hodi bele koloka planu no programa prioridade hodi kontinua dezenvolve instituisaun ne’ebé mak nia tutela.

“Imi sei la troka, ami mak kada tinan lima troka, esperiénsia ha’u nian tinan tolu sai vice Prezidente Parlamentu troka,” Adriano Nascimento konta tuir ho oin hamnasa.

Vizita Ministru Prezidensiál Konsellu Ministru, Adriano do Nascimento ba knua Tatoli hetan akompañamentu hosi Sekretáriu estadu konsellu Ministru VI governu, Avelino Coelho, Diretór Nasionál, Desiminasaun Informasaun-DNDI, Orlando da Conceição.

Entretantu iha oportunidade ne’e Diretór Orlando esplika ba Ministru Adriano kona-bá prosesu dezenvolvimentu TATOLI nian.

Nia dehan,  konsellu Ministru iha loron Tersa (11/07) iha Sala de Reuniaun Palásiu Governu nomea ona Prezidente Konsellu Diretivu TATOLI-Agência Noticiosa Timor-Leste I.P, Rosario da Graça Maia ba mandatu tinan haat, Nomeasaun aprova ho Resolução do Governu.

Proposta Rezolusaun Governu nian ne’e, mai hosi Sekretáriu Estadu Komunikasaun Sosiál, nu’udar membru Governu Tutela, no aprezenta iha Konsellu Ministru hosi Ministru Estadu Prezidénsia Konsellu Ministru, ho kandidatu úniku no hetan apresiasaun maximum hosi Konsellu Ministru.

Entretantu Ajénsia TATOLI sai hanesan fontes ofisial informasaun ne’ebé Nain hosi Ajénsia ne’e mak estadu Timor-Leste. Hanesan mós ajénsia Notísias sira seluk iha mundu, TATOLI mai ho papél ida atu halo kobertura no fahe informasaun importante ho lalais, akuradu, ba territóriu Timor-Leste no mós mundu.

TATOLI eziste bazeia ba desizaun konsellu ministru, loron 3 fulan Ferreiru, tinan 2016, ne’ebé konsagra iha akta No 9/2016, ho pájina Jornál Repúblika, loron 16, Marsu, 2016.

Instrumentu atu alkansa vizaun no misaun TATOLI nian, mak TATOLI sei sai hanesan fontes úniku ba informasaun nasionál ho kredibilidade, kualidade ba benefísiu sidadaun Timor-Leste.

Ajénsia TATOLI  hato’o informasaun ho karakter multimídia, multiplatform, no mós multichannel iha telefone android no IOS, inklui mídia online ne’ebé notísia eskrita, radio no televizaun ho previzaun ida sei halo atendimentu durante oras rua nulu resin hat ho notísia actual, ne’ebé sei oferese ho lia tolu, tetun, Inglés, no Portugés.

Professional Jornalista ne’ebé oras ne’e servisu iha Ajénsia TATOLI iha ema Nain hitu no hetan tulun hosi funsionáriu Sekretáriu Estadu Komunikasaun Sosiál (SEKOMS) diresaun desiminasaun informasaun.

*tatoli.tl